ಜಾನುವಾರು ಸಾಗಾಣೆ ದಂಧೆ ಅವ್ಯಾಹತ

10 ಕ್ಕೂ ಹೆಚ್ಚು ಜಾನುವಾರು ವಶ

ಅರಣ್ಯ ಇಲಾಖೆ ಗಸ್ತು ಪಡೆಯಿಂದ ವಶ

ತೀರ್ಥಹಳ್ಳಿ ತಾಲ್ಲೂಕಿನಲ್ಲಿ ರಾತ್ರಿ ಜಾನುವಾರು ಸಾಗಾಣೆ ದಂಧೆ ಅವ್ಯಾಹತವಾಗಿ ನಡೆಯುತ್ತಿದೆ. ಶುಕ್ರವಾರ ಬೆಳಗ್ಗಿನ ಜಾವ ಶಿವಮೊಗ್ಗ ಕಡೆಗೆ ಸಾಗಾಣೆಯಾಗುತ್ತಿದ್ದ 10ಕ್ಕೂ ಹೆಚ್ಚು ಜಾನುವಾರುಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಮಂಡಗದ್ದೆ ವಲಯಾರಣ್ಯಾಧಿಕಾರಿ ನೇತೃತ್ವದ ಗಸ್ತು ಪಡೆ ಬೆಳಗ್ಗಿನ ಜಾವ ಜಾನುವಾರು ಕಳ್ಳಸಾಗಣೆ ಮಾಡಲಾಗುತ್ತಿದ್ದ ವಾಹವನ್ನು ಅಡ್ಡಗಟ್ಟಿದೆ. 10ಕ್ಕೂ ಹೆಚ್ಚು ಜಾನುವಾರು, ವಾಹನ ಹಾಗೂ ಇಬ್ಬರು ಆರೋಪಿಗಳನ್ನು ಮಾಳೂರು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಅಕ್ರಮ ಜಾನುವಾರು ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆಗಾಗ ರಾಜಕೀಯ ಮೇಲಾಟಗಳು ನಡೆಯುತ್ತಿರುತ್ತವೆ. ಎಲ್ಲರು  ಕಳ್ಳದಂಧೆ ನಿಲ್ಲಿಸುವಂತೆ ಗುಟುರ್ ಹಾಕುತ್ತಾರೆ. ಆದರೆ ಇಂದಿಗೂ ಕೂಡ ದಂಧೆ ಮಾತ್ರ ತನ್ನ ಬಾಲವನ್ನು ವ್ಯಾಪಿಸುತ್ತಲೇ ಇದೆ. ಮಾಜಿ ಗೃಹಸಚಿವರ ತವರು ಕ್ಷೇತ್ರದಲ್ಲಿ ಪೊಲೀಸ್ ಇಲಾಖೆ ಕಳ್ಳತನವನ್ನು ತಡೆಯುವಲ್ಲಿ ವಿಫಲವಾಗುತ್ತಿದೆ.

ಸಾರ್ವಜನಿಕರು, ವಿವಿಧ ಪಕ್ಷಗಳ ಮುಖಂಡರು ಜಾನುವಾರು ಹಿಡಿದು ಕೊಟ್ಟರೆ ಮಾತ್ರ ಪೊಲೀಸರು ಪ್ರಕರಣ ದಾಖಲಿಸುತ್ತಾರೆ. ಆದರೆ ಪೊಲೀಸ್ ಕಾರ್ಯಾಚರಣೆ ಅಥವಾ ತಪಾಸಣೆ ಮಾತ್ರ ಬಡಪಾಯಿ ಹೆಲ್ಮೆಟ್ ಇಲ್ಲದ ಬೈಕ್ ಸವಾರರ ಮೇಲೆ ನಿತ್ಯ ನಿರಂತರವಾಗಿ ನಡೆಯುತ್ತಿರುತ್ತದೆ ಎಂಬ ಆರೋಪ ಸಾರ್ವಜನಿಕವಾಗಿ ಕೇಳಿ ಬಂದಿದೆ.