ಅಭಿವೃದ್ಧಿಗೆ ಆನೆ ನಡೆವ ದಾರಿಗೆ ಕತ್ತರಿ
ಮೃಗಾವಧೆ ಸಮೀಪ ಜೋಡಿ ಆನೆಗಳು...
ಶೆಟ್ಟಿಹಳ್ಳಿ ಅಭಯಾರಣ್ಯ, ಭದ್ರಾ ಅಭಯಾರಣ್ಯ, ಕುದುರೆಮುಖ ರಾಷ್ಟ್ರೀಯ ಉದ್ಯಾನವನ, ಮೂಕಾಂಬಿಕ ಅಭಯಾರಣ್ಯ, ಸೋಮೇಶ್ವರ ಅಭಯಾರಣ್ಯ, ಶರಾವತಿ ಅಭಯಾರಣ್ಯ ಸೇರಿದಂತೆ ಸುತ್ತಮುತ್ತಲು ವನ್ಯಜೀವಿ ಅರಣ್ಯ ಪ್ರದೇಶಗಳು ಒಳಗೊಂಡಿದೆ. ಇದಕ್ಕೆ ಸರಿ ಹೊಂದುವಂತೆ ಈಗಾಗಲೇ ಅರಣ್ಯ ಪ್ರದೇಶ ಅಕ್ರಮ ಪ್ರವೇಶವನ್ನು ನಿರ್ಬಂಧಿಸಲಾಗಿದೆ. ಜೊತೆಗೆ ಕಾಡು ಪ್ರಾಣಿಗಳ ಉಪಟಳ ಹೆಚ್ಚಿದಂತೆ ರೈತಾಪಿ ವರ್ಗಗಳ ಜೀವನ ದುಸ್ಥರವಾಗುತ್ತಿದೆ.
ಆಗುಂಬೆ ಕುದುರೆಮಖ ಶೋಲಾ ಕಾಡುಗಳ ನಡುವೆ ಸಂಚಾರ ಹೊಂದಿದ್ದ ಆಗುಂಬೆಯ ಒಂಟಿ ಸಲಗದ ದಾರಿಯನ್ನು ಶೃಂಗೇರಿಯಲ್ಲಿ ಬದಲಾಯಿಸಲಾಗಿತ್ತು. ಆದರ ಮಾರ್ಗ ಬದಲಾಗುತ್ತಿದ್ದಂತೆ ದಿಕ್ಕಾಪಾಲದ ಆನೆ ಬೇಗಾರು-ಹೊಳೆಕೊಪ್ಪ ಸಮೀಪ ಕಾಣಿಸಿಕೊಂಡಿತ್ತು. ಅದಾದ ಬಳಿಕ ಆಗುಂಬೆಯ ತನ್ನ ದಾರಿಯನ್ನು ಬಿಟ್ಟು ಹೊಸ ದಾರಿಯನ್ನು ಬಳಸಿಕೊಂಡು ಆನೆ ಸಂಚಾರ ನಡೆಸಿತ್ತು. ಈಚೆಗೆ ಮುಡುಬ ಸಮೀಪದ ಬಂದ ಆನೆ ತೂದೂರು ಮಾರ್ಗವಾಗಿ ಕೋಣಂದೂರು, ಆರಗ, ಕೊಂಡ್ಲೂರು ದಾರಿಯಲ್ಲಿ ಚಲಿಸಿ ಬೈಂದೂರಿಗೆ ಹೋಗಿತ್ತು. ಕಣಿವೆ ಸಮೀಪ ಆಗಾಗ ಭದ್ರಾ ಅಭಯಾರಣ್ಯದ ಪ್ರದೇಶದಿಂದ ಹೊಸಹಳ್ಳಿ ತನಕವು ಆಗಮಿಸಿತ್ತು. ಕಳೆದ ವರ್ಷ ತೀರ್ಥಹಳ್ಳಿ ಪಟ್ಟಣದ ಕುರುವಳ್ಳಿಗೆ ಬಂದು ದೇವಂಗಿಯ ಕಿರು ಅರಣ್ಯ ಪ್ರದೇಶವನ್ನು ಸೇರಿಕೊಂಡಿತ್ತು. ಮೂಗುಡ್ತಿ, ಯಡೂರು ಭಾಗಗಳಲ್ಲಿಯೂ ಆನೆಗಳು ಆಗಾಗ ಕಾಣಿಸಿಕೊಂಡಿದೆ.
ಇದೀಗ ಮೃಗಾವಧೆಯ ಸಮೀಪದ ಶೇಡ್ಗಾರು-ಕೌರಿ ಬಳಿ ಎರಡು ಆನೆಗಳು ಬಂದಿದೆ. ಕೊಪ್ಪದಲ್ಲಿ ಕಾಣಿಸಿಕೊಂಡಿದ್ದ ಆನೆ ಈಗ ಮಕ್ಕಿಮನೆ, ಬಂಡಿಗಡಿ ಮಾರ್ಗವಾಗಿ ತೀರ್ಥಹಳ್ಳಿಯ ಅಂಚಿನ ಗ್ರಾಮಗಳಿಗೆ ಲಗ್ಗೆ ಇಟ್ಟಿವೆ. ಈಗಾಗಲೇ ಪಟಾಕಿ ಸಿಡಿಸುವ ತಂತ್ರಗಾರಿಕೆ ನಡೆಯುತ್ತಿದ್ದು ಆನೆ ಇನ್ನೆಲ್ಲಿ ಓಡಿ ಹೋಗಲಿದೆ ಎಂಬ ಆತಂಕ ಗ್ರಾಮಗಳಲ್ಲಿ ಸೃಷ್ಟಿಯಾಗಿದೆ.
ಒಟ್ಟಿನಲ್ಲಿ ತೀರ್ಥಹಳ್ಳಿ ಪಟ್ಟಣ ಸುತ್ತುವರಿದು ಆನೆಗಳು ತಮ್ಮ ಆವಾಸ ಸ್ಥಾನವನ್ನು ಮರು ರೂಪಿಸಿಕೊಳ್ಳುತ್ತಿದ್ದು ಇನ್ನು ಕೆಲವೇ ವರ್ಷಗಳಲ್ಲಿ ಆನೆಗಳು ತೀರ್ಥಹಳ್ಳಿಯ ಸುತ್ತಲು ನಿತ್ಯ ಓಡಾಟ ಮಾಡಿದರು ಅಚ್ಚರಿ ಪಡಬೇಕಿಲ್ಲ. ಆನೆ, ಹುಲಿ, ಕಾಳಿಂಗ, ಚಿರತೆ, ಕಾಡುಕೋಣ, ಹಂದಿ, ಕುರ್ಕ ಮುಂತಾದ ಪ್ರಾಣಿಗಳಿಂದ ರೈತಾಪಿ, ಜನಜೀವನ ಅಲ್ಲೋಲ ಕಲ್ಲೋಲ ಆಗುವ ಸಾಧ್ಯತೆ ಹೆಚ್ಚಳವಾಗುತ್ತಿದೆ.
ಸಕಲೇಶಪುರ ಭಾಗದಲ್ಲಿ ಆನೆ ಕಾರಿಡಾರ್ ಕಡಿದು ದೊಡ್ಡ ಅಭಿವೃದ್ಧಿ ಯೋಜನೆಗಳು ಜಾರಿಯಾಗಿದ್ದವು. ರೈಲ್ವೆ, ರಸ್ತೆಯ ಮಾರ್ಗಗಳು ಆದಂತೆ ಪ್ರಾಣಿಗಳ ನಿತ್ಯ ಓಡಾಟಕ್ಕೆ ತೊಂದರೆಯಾಗುತ್ತಿದ್ದವು. ಅದಾದ ಬಳಿಕ ಇದೀಗ ಅದೇ ರೀತಿಯ ಯೋಜನೆಗಳು ಶೃಂಗೇರಿ ಭಾಗದಲ್ಲಿ ನಡೆಯುತ್ತಿದ್ದು ಪ್ರಾಣಿಗಳ ದಾರಿ ಬದಲಾಗುತ್ತಿದೆ. ಜೊತೆಗೆ ಅವುಗಳ ಆವಾಸಸ್ಥಾನ ಬದಲಾವಣೆ ಮಾನವ ಪ್ರಾಣಿ ಸಂಘರ್ಷವನ್ನು ಹೆಚ್ಚಿಸುತ್ತಿದೆ.