ರಾತ್ರಿ ಕಳ್ಳ ಸಾಗಟಕ್ಕೆ ಪಟ್ಟು ಹಿಡಿದ ದಂಧೆಕೋರರು

ಮುಲಾಜಿಲ್ಲದೆ ಟ್ರಂಚ್‌ ಹೊಡೆದು ಅಕ್ರಮ ತಡೆದ ಅರಣ್ಯ ಅಧಿಕಾರಿಗಳು
ಮಂಡಗದ್ದೆ ಡಿಆರ್‌ಎಫ್‌ಓ ಅಮಿತ್ ಎಸ್‌ ನೇತೃತ್ವದಲ್ಲಿ ಕಾರ್ಯಾಚರಣೆ

ತೀರ್ಥಹಳ್ಳಿ ತಾಲ್ಲೂಕಿನ ರಾಷ್ಟ್ರೀಯ ಹೆದ್ದಾರಿ 169ರ ಮಾರ್ಗ ಮಧ್ಯೆಯ ಮಂಡಗದ್ದೆ ಸಮೀಪ ಅಕ್ರಮ ಮರಳು ಸಾಗಾಣೆ ದಂಧೆ ಎಗ್ಗಿಲ್ಲದೆ ನಡೆಯುತ್ತಿದೆ ಎಂಬ ದೂರುಗಳ ಹಿನ್ನಲೆಯಲ್ಲಿ ಸೋಮವಾರ ಮಂಡಗದ್ದೆ ಡಿಆರ್‌ಎಫ್‌ಓ ಅಮಿತ್‌ ಎಸ್‌ ನೇತೃತ್ವದಲ್ಲಿ ಕಾರ್ಯಾಚರಣೆ ನಡೆದಿದ್ದು ದಂಧೆಗಾಗಿ ಬಳಕೆಯಾಗುತ್ತಿದ್ದ ಮಾರ್ಗವನ್ನು ಸಂಪೂರ್ಣವಾಗಿ ಟ್ರಂಚ್‌ ಹೊಡೆಯುವ ಮೂಲಕ ಬಂದ್‌ ಮಾಡಲಾಗಿದೆ.

ಮಂಡಗದ್ದೆ ಪೇಟೆಯಲ್ಲಿ ಮರಳು ದಂಧೆಗೆ ಅವಕಾಶ ನೀಡಬೇಕೆಂಬ ತೀವ್ರ ಒತ್ತಡಗಳು ಕೇಳಿ ಬಂದಿತ್ತು. ಅಲ್ಲದೇ ವಿವಿಧ ರೀತಿಯ ಭಯ ಹುಟ್ಟಿಸುವ ಪ್ರಯತ್ನದ ನಡುವೆಯು ಅಮಿತ್‌ ಹಿಂದುಮುಂದು ನೋಡದೆ ಟ್ರಂಚ್‌ ಹೊಡೆಸಿದ್ದು ದಂಧೆಕೋರರ ಕೆಂಗಣ್ಣಿಗೆ ಗುರಿಯಾಗುವಂತಹ ವಾತಾವರಣ ನಿರ್ಮಾಣವಾಗಿದೆ.

ರಾಷ್ಟ್ರೀಯ ಹೆದ್ದಾರಿಗೆ ಹೊಂದಿಕೊಂಡಂತೆ ರಾತ್ರಿಯಲ್ಲದೆ ಹಗಲಿನಲ್ಲಿಯೂ ಪಿಕಪ್‌ ವಾಹನವನ್ನು ನದಿಗೆ ಇಳಿಸಿ ರಾಜಾರೋಷವಾಗಿ ಮರಳು ಸಾಗಿಸಲಾಗುತ್ತಿತ್ತು. ವಿಷಯ ತಿಳಿಯುತ್ತಿದಂತೆ ಲಿಂಗಾಪುರ ಗ್ರಾಮದ ಸರ್ವೆ ನಂಬರ್‌ 100ರ ಸರ್ಕಾರಿ ಸ್ಮಶಾನಕ್ಕೆ ಹೊಂದಿಕೊಂಡಿರುವ ತುಂಗಾನದಿಯಲ್ಲಿ ಮುಂಜಾನೆ ನದಿಯಲ್ಲಿ ಮರಳು ತೆಗೆಯುವಾಗ ದಿಢೀರ್‌ ದಾಳಿ ನಡೆಸಿದ್ದಾರೆ. ದಾಳಿ ನಡೆಯುತ್ತಿದ್ದಂತೆ ಪಿಕಪ್‌ ವಾಹನದ ಸಮೇತ ದಂಧೆಕೋರರು ಪರಾರಿಯಾಗಿದ್ದಾರೆ. ಸ್ಥಳದಲ್ಲಿ ಸುಮಾರು 50 ಮೂಟೆಗಳ ಮರಳು ವಶಕ್ಕೆ ಪಡೆದುಕೊಂಡಿದ್ದಾರೆ. ವಾಹನಗಳು ಸ್ಥಳಕ್ಕೆ ತೆರಳದಂತೆ ಬೃಹತ್‌ ಕಂದಕಗಳನ್ನು ನಿರ್ಮಿಸುವಲ್ಲಿ ಮಂಡಗದ್ದೆ ವಲಯಾರಣ್ಯಾಧಿಕಾರಿ ಮಾರ್ಗದರ್ಶನದಲ್ಲಿ ಉಪವಲಯ ಅರಣ್ಯಾಧಿಕಾರಿ ಅಮಿತ್‌ ಎಸ್‌, ಅರಣ್ಯ ರಕ್ಷಕ ಮಹಾದೇವ ಯಶಸ್ವಿಯಾಗಿದ್ದಾರೆ.