ಶಿವಮೊಗ್ಗ ಪ್ರೆಸ್ ಟ್ರಸ್ಟ್ ಕ್ರಿಯಾಶೀಲ ಪ್ರಶಸ್ತಿ ಪುರಸ್ಕಾರಕ್ಕೆ ಮೆಚ್ಚುಗೆ
ಪತ್ರ ಬರೆದು ಅಭಿನಂದಿಸಿದ ಸಂಸದ ಬಿ.ವೈ.ರಾಘವೇಂದ್ರ
ನಾಡಿನ ಹಿರಿಯ ಪತ್ರಕರ್ತ, ಲೇಖಕ, ಕಾದಂಬರಿಗಾರ ಶಿವಾನಂದ ಕರ್ಕಿ ಅವರಿಗೆ ಇತ್ತೀಚಿಗೆ ಶಿವಮೊಗ್ಗ ಪ್ರೆಸ್ ಟ್ರಸ್ಟ್ ತನ್ನ ವಾರ್ಷಿಕ ಪ್ರಶಸ್ತಿ ನೀಡಿ ಗೌರವಿಸಿದೆ. ಕ್ರಿಯಾಶೀಲ ಪತ್ರಕರ್ತ ಪ್ರಶಸ್ತಿ ಪಡೆದ ಅವರಿಗೆ ಸಂಸದ ಬಿ ವೈ ರಾಘವೇಂದ್ರ ಪತ್ರದ ಮೂಲಕ ಹೃತ್ಪೂರ್ವಕ ಅಭಿನಂದನೆ ಸಲ್ಲಿಸಿದ್ದಾರೆ.
ಪತ್ರದಲ್ಲಿ ಶಿವಾನಂದ ಅವರ ಸಾಮಾಜಿಕ ಹೋರಾಟ, ಬರಹಗಳು ಮತ್ತು ಬದುಕನ್ನು ತಾವು ಹತ್ತಿರದಿಂದ ಗಮನಿಸಿದ್ದು ಅವರೊಬ್ಬ ಮಾದರಿ ಪತ್ರಕರ್ತ ಹಾಗೂ ಜನಪರ ಸಾಹಿತಿ. ಬಿಡುವಿನ ವೇಳೆಯಲ್ಲಿ ಅವಕಾಶ ದೊರೆತಾಗ ಅವರ ಸಾಹಿತ್ಯ ಹಾಗೂ ಅನೇಕ ಪ್ರಭಾವಶಾಲಿ ವರದಿಗಳನ್ನು ಪ್ರಜಾವಾಣಿಯಲ್ಲಿ ಓದಿರುವೆ. ಈಗ ಅವರಿಗೆ ದೊರೆತಿರುವ ಪ್ರಶಸ್ತಿಗೆ ಅವರು ಅತ್ಯಂತ ಅರ್ಹರು ಮಾತ್ರವಲ್ಲ ಪ್ರಶಸ್ತಿಗೂ ಮೌಲ್ಯ ಹೆಚ್ಚಾಗಿದೆ ಎಂದು ರಾಘವೇಂದ್ರ ಹೇಳಿದ್ದಾರೆ.
ಶಿವಾನಂದ ನೆಲದ ಧ್ವನಿ ಪತ್ರಿಕೆ ಹಾಗೂ ಡಿಜಿಟಲ್ ಮೀಡಿಯಾದ ಪ್ರಧಾನ ಸಂಪಾದಕರು, ಪ್ರಜಾವಾಣಿ ದಿನ ಪತ್ರಿಕೆಯ ತೀರ್ಥಹಳ್ಳಿ ವರದಿಗಾರನಾಗಿ 25ವರ್ಷಕ್ಕೂ ಹೆಚ್ಚು ಕಾಲ ಸೇವೆ ಸಲ್ಲಿಸಿದ್ದಾರೆ.
ಜಾನಪದ ಎಂ.ಎ. ಓದುವಾಗಲೇ ಅನೇಕ ಚೇತೋಹಾರಿ ಕತೆಗಳನ್ನು ಬರೆದು ಭರವಸೆ ಮೂಡಿಸಿದ್ದ ಕರ್ಕಿ ಪ್ರತಿಷ್ಠಿತ ಪ್ರಜಾವಾಣಿ, ದೀಪಾವಳಿ ವಿಶೇಷಾಂಕ ಸ್ಪರ್ಧೆಯಲ್ಲಿ ಮೆಚ್ಚುಗೆಯನ್ನು ಪಡೆದಿದ್ದರು. ಇತ್ತೀಚೆಗೆ ತಮ್ಮ ಖಾನೇಷುಮಾರಿ ಕೃತಿ ಮೂಲಕ ನಾಡಿನ ಸಾಹಿತ್ಯ ವಲಯದ ಗಮನಸೆಳೆದು ಬಳಿಕ ಗರ್ಕು ಎಂಬ ಕಾದಂಬರಿಯಯನ್ನು ಕೂಡ ರಚಿಸಿದ್ದಾರೆ.
