ಅಕ್ರಮಕ್ಕೆ ಸಹಿ
ಹಾಕದಿದ್ದರೆ ಕೊಲೆ ಮಾಡುವೆ ಎಂದ ಸಿಬ್ಬಂದಿ…!
ತೀರ್ಥಹಳ್ಳಿ ತಾಲ್ಲೂಕು
ಸರ್ವೆ ಇಲಾಖೆಯಲ್ಲಿ ಅರಾಜಕತೆ…?
ತೀರ್ಥಹಳ್ಳಿ ತಾಲ್ಲೂಕು
ಕಚೇರಿಯಲ್ಲಿ ಅಧಿಕಾರಿಗಳ ಅಟ್ಟಹಾಸ ತಾರಕಕ್ಕೆ ಏರಿದೆ. ತಹಶೀಲ್ದಾರ್ ಆದಿಯಾಗಿ ಜಿಲ್ಲಾಧಿಕಾರಿಗಳ ಆದೇಶಕ್ಕೂ
ಯಾವುದೇ ಬೆಲೆ ಇಲ್ಲದಂತಹ ಅರಾಜಕತೆ ಆಡಳಿತದಲ್ಲಿ ನಡೆಯುತ್ತಿದೆ. ಶಾಸಕ ಆರಗ ಜ್ಞಾನೇಂದ್ರ ಕ್ಷೇತ್ರದ
ಉದ್ದಾರಕ್ಕಾಗಿ ಸಾಕಷ್ಟು ಬಿಗಿ ಕ್ರಮ ಕೈಗೊಂಡಿದ್ದೇನೆ. ಅಕ್ರಮಗಳಿಗೆ ಯಾವುದೇ ರೀತಿಯ ಬೆಂಬಲ ಇಲ್ಲ.
ತಪ್ಪು ಮಾಡಿದವರನ್ನು ಶಿಕ್ಷಿಸಿಯೇ ಸಿದ್ಧ ಎಂದು ಆಗಾಗ ತಾಲ್ಲೂಕು ಕಚೇರಿಗೆ ಸಡನ್ ಭೇಟಿ ನೀಡುತ್ತಿದ್ದರೂ
ನೌಕರರ ಹಂತದಲ್ಲಿ ಇದಕ್ಕೆ ಪುಡಿಗಾಸಿನ ಬೆಲೆ ಇಲ್ಲದಂತಾಗಿದೆ.
ಸಾರ್ವಜನಿಕರ ಕೆಲಸಕ್ಕಾಗಿ
ತಬರನಂತೆ ಅಲೆಯುವ ವಾತಾವರಣ ಬಹುಕಾಲದಿಂದ ಸುಧಾರಣೆಯಾಗಿಲ್ಲ. ಈಗ ಹತ್ತಾರು ವರ್ಷಗಳ ಕಾಲ ತಾಲ್ಲೂಕಿನಲ್ಲೇ
ಜಾಂಡಾ ಹೂಡಿರುವ ಸಿಬ್ಬಂದಿಗಳು ಇಲ್ಲಸಲ್ಲದ ನೆಪದಲ್ಲಿ ಅಕ್ರಮಕ್ಕೆ ಮುಂದಾಗುತ್ತಿರುವ ಊಹಾಪೋಹಗಳು,
ನ್ಯಾಯಾಲಯ ಸೇರಿದಂತೆ ಜಿಲ್ಲಾಧಿಕಾರಿಗಳ ಸಮಕ್ಷಮಕ್ಕೂ ಗೊತ್ತಿರುವ ವಿಚಾರವಾಗಿದೆ. ಇದೀಗ ಹೊಸ ಬಗೆಯ
ಹದಗೆಟ್ಟ ಆಡಳಿತ ವ್ಯವಸ್ಥೆ ತಾಲ್ಲೂಕು ಕಚೇರಿಯಲ್ಲಿ ನಡೆಯುತ್ತಿರುವುದು ವಿಷಾಧನೀಯ ಬೆಳವಣಿಗೆಯಾಗಿದೆ.
ಇತ್ತೀಚೆಗೆ ಸರ್ವೆ
ಇಲಾಖೆಯಲ್ಲಿ ಸಿಬ್ಬಂದಿಯೊಬ್ಬರು ಅಕ್ರಮದ ಫೈಲ್ ಒಂದಕ್ಕೆ ಸಹಿ ಹಾಕುವಂತೆ ಅಧಿಕಾರಿಗೆ ದಬಾಯಿಸಿದ್ದಾರೆ.
ಅಕ್ರಮಕ್ಕೆ ಬೆಂಬಲ ಮಾಡುವುದಿಲ್ಲ ಕಾನೂನು ತೊಡಕು ಉಂಟಾಗುತ್ತದೆ ಎಂದು ಹೇಳುತ್ತಿದ್ದಂತೆ ರೊಚ್ಚಿಗೆದ್ದ
ಸಿಬ್ಬಂದಿ “ಮುಚ್ಚಿಕೊಂಡು ಸಹಿ ಹಾಕು, ಇಲ್ಲದಿದ್ದರೆ ನಿನ್ನ ಮೇಲೆ ಕಾರು ಹತ್ತಿಸಿ ಕೊಲೆ ಮಾಡುತ್ತೇನೆ”ಎಂದು ನಾಗರೀಕರ ಎದುರಿಗೆ
ಬೆದರಿಕೆ ಒಡ್ಡಿರುವ ಸಂಗತಿ ಈಗ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೀಡಾಗುತ್ತಿದೆ.
ನೌಕರರ ಕಿತ್ತಾಟ
ತಡೆಯುವಲ್ಲಿ ಹೇಗೆ ತಾಲ್ಲೂಕು ಆಡಳಿತ, ಜನಪ್ರತಿನಿಧಿಗಳು ಸೋಲುತ್ತಿದ್ದಾರೆ ಎಂಬುದಕ್ಕೆ ಇದೊಂದು ನೈಜ
ಉದಾಹರಣೆಯಾಗಿದೆ. ಹೊರ ಜಿಲ್ಲೆಯಿಂದ ಆಗಮಿಸಿರುವ ಅಧಿಕಾರಿಗಳಿಗೆ ಸ್ಥಳೀಯರ ನೆಪದಲ್ಲಿ ಕಾರು ಹತ್ತಿಸಿ
ಕೊಲ್ಲುತ್ತೇನೆ ಎಂದು ಹೆದರಿಸುವುದಾದರೆ ಆಡಳಿತ ಏನು ಕ್ರಮ ಕೈಗೊಳ್ಳುತ್ತಿದೆ. ರಾಜ್ಯ ಸರ್ಕಾರ ತನ್ನದೇ
ನೌಕರರ ಹಿತಾಸಕ್ತಿಯನ್ನು ಪಾಲಿಸುವಲ್ಲಿ ಎಷ್ಟು ನಿರ್ಲಜ್ಜಗೇಡಿ ಆಡಳಿತ ನಡೆಸುತ್ತಿದೆ ಎಂದು ಆಕ್ರೋಶ
ಶುರುವಾಗಿದೆ. ಒಂದೇ ಕ್ಷೇತ್ರದಲ್ಲಿ ಹತ್ತಾರು ವರ್ಷಗಳಿಂದ ಜಾಂಡಾ ಹೂಡಿರುವ ಸಿಬ್ಬಂದಿಯನ್ನು ಏಕೆ
ಉಳಿಸಿಕೊಳ್ಳುತ್ತಿದೆ. ಅವರ ಉಪಯೋಗವನ್ನು ಜನಪ್ರತಿನಿಧಿಗಳು ಪಡೆಯುತ್ತಿದ್ದಾರೆಯೇ ಎಂಬ ಊಹಾಪೋಹಗಳು
ಹರಿಬಿದ್ದಿದೆ.
ಇಂತಹ ಲಜ್ಜೆಗೇಡಿ
ಸಿಬ್ಬಂದಿಗಳನ್ನು ತಕ್ಷಣಕ್ಕೆ ಅಮಾನತ್ತು ಮಾಡಬೇಕು. ಕೊಲೆ ಬೆದರಿಕೆ ಪ್ರಕರಣದ ವಿರುದ್ಧ ಕ್ರಿಮಿನಲ್
ಕೇಸ್ ದಾಖಲಿಸಬೇಕು. ಕಚೇರಿಯಲ್ಲಿ ಅನೇಕ ವರ್ಷ ಕಾರ್ಯ ನಿರ್ವಹಿಸುತ್ತಿರುವ ಸಿಬ್ಬಂದಿಯನ್ನು ವರ್ಗಾವಣೆ
ಮಾಡಬೇಕೆಂಬ ಒತ್ತಾಯ ಸಾರ್ವಜನಿಕರಿಂದ ಕೇಳಿ ಬರುತ್ತಿದೆ.