ನ್ಯಾಷನಲ್ ಸಮೂಹ ಸಂಸ್ಥೆಯ ಮೇಲೆ ಇಡಿ, ಐಟಿ ದಾಳಿ

ತಡರಾತ್ರಿ ಮುಂದುವರೆದ ತಪಾಸಣೆ

ಪಾದಾಚಾರಿ ಮಾರ್ಗದಲ್ಲಿ ಇಡಿ ವಾಹನ ನಿಲುಗಡೆ

ಉಡುಪಿ, ಪಡುಬಿದ್ರೆ, ಮಂಗಳೂರಿನಲ್ಲಿ ದಾಳಿ

ರಾಜ್ಯದ ನಿರ್ಮಾಣ ಮತ್ತು ವ್ಯಾಪಾರ ಸಂಸ್ಥೆಯಾದ ನ್ಯಾಷನಲ್ ಸಮೂಹ ಸಂಸ್ಥೆಗೆ ಸೇರಿದ ಕಚೇರಿ, ವ್ಯಾಪಾರ ಮಳಿಗೆ, ಪಾಲುದಾರರ ಮನೆ ಮೇಲೆ ಮಂಗಳವಾರ ಬೆಳಿಗ್ಗೆ 5.30ಕ್ಕೆ ಇಡಿ, ಐಟಿ (ತೆರಿಗೆ) ಅಧಿಕಾರಿಗಳ ತಂಡದಿಂದ ಶೋಧ, ತನಿಖೆ ನಡೆಸಿದೆ. ತಡರಾತ್ರಿವರೆಗೂ ಶೋಧಾಚರಣೆ ಮುಂದುವರೆದಿದ್ದು ಸಿಬ್ಬಂದಿಗಳ ಮೊಬೈಲ್ ಜಪ್ತಿ ಮಾಡಿದ್ದು, ಕಾರ್ಯಸ್ಥಳದಿಂದ ಹೊರಗೆ ಬಿಡದೆ ಪರಿಶೀಲನೆ ನಡೆಸಿದ್ದಾರೆ.

ಆಜಾದ್ ರಸ್ತೆಯಲ್ಲಿರುವ ನ್ಯಾಷನಲ್ ಇನ್ಫಾಬಿಲ್ಡ್ ಪ್ರೈ.ಲಿ., ನ್ಯಾಷನಲ್ ಇಂಡಿಯನ್ ಗ್ಯಾಸ್, ಎಂಟರ್ ಪ್ರೈಸಸ್, ನ್ಯಾಷನಲ್ ಸೂಪರ್ ಬಜಾರ್, ನ್ಯಾಷನಲ್ ಗೋಲ್ಡ್ ಅಂಡ್ ಡೈಮಂಡ್, ನ್ಯಾಷನಲ್ ಸೂಪರ್ ಬಜಾರ್, ಬಾಳೇಬೈಲು ಮನೆ, ಸೀಬಿನಕೆರೆ ಮನೆ ಸೇರಿದಂತೆ ಅನೇಕ ಕಡೆಗಳು ದಾಳಿ ನಡೆಸಿದ್ದಾರೆ.

ಬೊಬ್ಬಿ ಸಮೀಪ ಇರುವ ಜಲ್ಲಿ ಕ್ರಷರ್ ಘಟಕದ ಸ್ಥಳವನ್ನು ಅಧಿಕಾರಿಗಳ ತಂಡ ಪರಿಶೀಲಿಸಿದೆ. 15ಕ್ಕೂ ಹೆಚ್ಚು ಇನೋವಾ ಕಾರು, ಟಿಟಿ ವಾಹನದಲ್ಲಿ ಸುಮಾರು 50ಕ್ಕೂ ಹೆಚ್ಚು ಅಧಿಕಾರಿಗಳು ತಪಾಸಣೆಗೆ ಆಗಮಿಸಿದ್ದಾರೆ.

ಉಳಿದಂತೆ ರಾಜ್ಯದ ನಾನಾ ಭಾಗಗಳಲ್ಲಿ ಸಮೂಹ ಸಂಸ್ಥೆಗೆ ಸೇರಿದ್ದ ಸ್ವತ್ತುಗಳು ಮತ್ತು ಆಸ್ತಿಗಳಿಗೆ ಸಂಬಂಧಿಸಿದಂತೆ ಬೆಂಗಳೂರು, ಪಡುಬಿದ್ರೆ, ಕಾರ್ಕಳ, ಹಾಸನ, ಮಂಗಳೂರು, ಶಿವಮೊಗ್ಗ ಸೇರಿದಂತೆ ಹಲವು ಕಡೆಗಳಲ್ಲಿ ಏಕಕಾಲದಲ್ಲಿ ದಾಳಿ ನಡೆದಿದೆ. ಈ ಹಿಂದೆಯೂ 2012ರಲ್ಲಿ ಐಟಿ ದಾಳಿ ನಡೆದಿತ್ತು.

ಉಡುಪಿ ಕಾರ್ಕಳ ಕ್ರಷರ್ ಮಾಲೀಕನ ಮನೆಯ ಮೇಲೆ ಇಡಿ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಕಾರ್ಕಳದ ನಿಟ್ಟೆ ಗ್ರಾಮದ ಗುಂಡ್ಯಡ್ಕದ ಮಹಾಗಣಪತಿ ಮಾಲೀಕನ ಮನೆಯ ಮೇಲೆ ದಾಳಿ ನಡೆದಿದೆ. ಎರಡು ಇನೋವಾ ಕಾರಿನಲ್ಲಿ ಸುಮಾರು 12 ಅಧಿಕಾರಿಗಳು ಬೆಳಗ್ಗೆಯಿಂದಲೇ ಕಾರ್ಯಾಚರಣೆ ನಡೆಸಿದ್ದಾರೆ.

ದಾಳಿ ಸಾರ್ವಜನಿಕರಿಗೆ ತೊಂದರೆ !

ತೀರ್ಥಹಳ್ಳಿ ಪಟ್ಟಣದ ಅಜಾದ್ ರಸ್ತೆಯಲ್ಲಿರುವ ನ್ಯಾಷನಲ್ ಗೋಲ್ಡ್ ಅಂಡ್ ಡೈಮಂಡ್ ಮಳಿಗೆ ಮುಂಭಾಗದ ಪುಟ್ಪಾತ್ನಲ್ಲಿ ಅಧಿಕಾರಿಗಳ ತಂಡ ಆಗಮಿಸಿದ್ದ ಬಾಡಿಗೆ ವಾಹನ ನಿಲ್ಲಿಸಿದ್ದರಿಂದ ಪಾದಾಚಾರಿಗಳ ಸಂಚಾರಕ್ಕೆ ತೊಂದರೆ ಉಂಟಾಯಿತು. ಕೇಂದ್ರ ಸರ್ಕಾರದ ಸ್ವಾಯತ್ತ ಸಂಸ್ಥೆಯಾಗಿರುವ ಇಡಿ ಅಧಿಕಾರಿಗಳು ದೇಶದ ನಾನಾ ಭಾಗಗಳಲ್ಲಿ ಪರಿಶೀಲನೆ ನಡೆಸುತ್ತಾರೆ. ಆ ಸಂದರ್ಭದಲ್ಲಿ ಸಿಗುವ ಕೆಲವು ಮಾಹಿತಿ ಹೊರತು ಪಡಿಸಿ ಉಳಿದ ಮಾಹಿತಿಗಳು ನಮಗೆ ಸಿಗುವುದಿಲ್ಲ. ಪ್ರಜೆಗಳ ರಾಷ್ಟ್ರದಲ್ಲಿ ಪೂರ್ಣ ಹಕ್ಕು ಹೊಂದಿರುವ ಪ್ರಜೆಗಳಿಗೆ ಮಾತ್ರ ಮಾಹಿತಿ ಸಿಗುವುದಿಲ್ಲ. ಇಂತಹ ವಿಚಾರದಲ್ಲಿ ದೇಶದ ಭದ್ರತೆ, ಹಿತದೃಷ್ಟಿಯಂತಹ ಸೂಕ್ಷ್ಮ ವಿಚಾರಗಳು ಇಲ್ಲದಿದ್ದರು ಮಾಹಿತಿ ಮಾತ್ರ ಅಪರಿಪೂರ್ಣವಾಗಿರುತ್ತದೆ. ಹಾಗಿದ್ದಾಗಲೂ ಹಿತಾಸಕ್ತಿಯಿರುವ ದಾಳಿಯಿಂದ ನಾಗರೀಕರಿಗೆ ಯಾಕೆ ತೊಂದರೆ ಕೊಡಬೇಕು ಎಂಬ ಪ್ರಶ್ನೆಯನ್ನು ಸಾರ್ವಜನಿಕರು ಮಾತನಾಡಿಕೊಳ್ಳುತ್ತಿರುವ ಸಾಮಾನ್ಯವಾಗಿ ಕೇಳಿ ಬಂತು.