ವಿನಾಯಕ ಚಿತ್ರಮಂದಿರದಲ್ಲಿ ತೇಜಸ್ವಿ ಕಥೆಯಾಧಾರಿತ ''ಡೇರ್ ಡೆವಿಲ್ ಮುಸ್ತಾಫಾ" ಚಿತ್ರ ಪ್ರದರ್ಶನ
ಮಕ್ಕಳಲ್ಲಿ ಮತ್ತು ಸಮಾಜದಲ್ಲಿ ಸಾಮರಸ್ಯ, ಭ್ರಾತೃತ್ವ ಮೂಡಿಸುವ ಸಂದೇಶ ಸಾರುವ ಖ್ಯಾತ ಸಾಹಿತಿ ಪೂರ್ಣಚಂದ್ರ ತೇಜಸ್ವಿ ಅವರ ಕಥೆ 'ಡೇರ್ ಡೆವಿಲ್ ಮುಸ್ತಾಫಾ' ಚಲನಚಿತ್ರವಾಗಿ ನಿರ್ಮಾಣಗೊಂಡು ಈಗಾಗಲೇ ಎಲ್ಲೆಡೆ ಜನರ ಮನಸೂರೆಗೊಂಡಿದೆ.
ತೇಜಸ್ವಿಯವರ ಸಾಹಿತ್ಯಾಭಿಮಾನಿಗಳೇ ಹಣವನ್ನು ತೊಡಗಿಸಿ ಈ ಸಿನಿಮಾವನ್ನು ನಿರ್ಮಿಸಿದ್ದಾರೆ. ಖ್ಯಾತ ನಟ ಹಾಗೂ ಪ್ರಗತಿಪರ ಚಿಂತಕ ಡಾಲಿ ಧನಂಜಯ ಅವರು ಕೂಡ ಈ ಸಿನಿಮಾ ನಿರ್ಮಾಣಕ್ಕೆ ಸಹಕರಿಸಿದ್ದಾರೆ. ಈ ಚಿತ್ರವನ್ನು ಶಶಾಂಕ್ ಸೋಗಾಲ್ ಅವರು ನಿರ್ದೇಶನ ಮಾಡಿದ್ದಾರೆ.
ತೀರ್ಥಹಳ್ಳಿಯ ಮಲೆನಾಡ್ ಕ್ಲಬ್, ಕುವೆಂಪು ಪ್ರತಿಷ್ಠಾನ ಕುಪ್ಪಳಿ, ಪುಸ್ತಕ ಪ್ರಕಾಶನ ಮೈಸೂರು, ಪಟ್ಟಣ ಪಂಚಾಯತಿ ತೀರ್ಥಹಳ್ಳಿ, ರಾಷ್ಟ್ರೀಯ ಶಿಕ್ಷಣ ಸಮಿತಿ ಶಿವಮೊಗ್ಗ, ತುಂಗಾ ವಿದ್ಯಾವರ್ಧಕ ಸಂಘ, ಸಹ್ಯಾದ್ರಿ ಶಿಕ್ಷಣ ಸಂಸ್ಥೆಗಳು ತಾಲೂಕು ಒಕ್ಕಲಿಗರ ಸಂಘ, ಸತ್ಪಥ ಎಜುಕೇಷನ್ ಟ್ರಸ್ಟ್, ರೋಟರಿ, ಲಯನ್ಸ್, ಜೇಸಿ ಸಂಸ್ಥೆಗಳು, ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತು, ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘ ತೀರ್ಥಹಳ್ಳಿ ಘಟಕ, ಶ್ರೀ ವಿನಾಯಕ ಚಿತ್ರಮಂದಿರ ಹಾಗೂ ಇನ್ನಿತರ ಸಂಘ ಸಂಸ್ಥೆಗಳ ಸಹಯೋಗದಲ್ಲಿ ಡೇರ್ ಡೆವಿಲ್ ಮುಸ್ತಫಾ ಸಿನಿಮಾವು ತೀರ್ಥಹಳ್ಳಿಯ ಶ್ರೀ ವಿನಾಯಕ ಚಿತ್ರ ಮಂದಿರದಲ್ಲಿ ಜೂ. 30 ರ ಶುಕ್ರವಾರದಿಂದ ಮುಂದಿನ ಗುರುವಾರದವರೆಗೆ ಒಂದು ವಾರ ಕಾಲ ಪ್ರದರ್ಶನಗೊಳ್ಳಲಿದೆ.
ಪ್ರತಿ ದಿನ 4 ಪ್ರದರ್ಶನಗಳಿದ್ದು, ವಿದ್ಯಾರ್ಥಿಗಳೇ ಈ ಚಿತ್ರದಲ್ಲಿ ಅಭಿನಯಿಸಿರುವುದರಿಂದ ಶಾಲಾ- ಕಾಲೇಜು ಮಕ್ಕಳಿಗೆ ಈ ಸಿನಿಮಾವನ್ನು ವೀಕ್ಷಿಸಲು ಉಚಿತ ಪ್ರವೇಶ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ.
ಉಳಿದಂತೆ ಈ ಸಿನಿಮಾಕ್ಕೆ ರಾಜ್ಯ ಸರ್ಕಾರವೇ ತೆರಿಗೆ ವಿನಾಯತಿ ನೀಡಿರುವುದರಿಂದ ಸಾರ್ವಜನಿಕರು ಕೂಡ ಸದಭಿರುಚಿಯ ಈ ಸಿನಿಮಾವನ್ನು ರಿಯಾಯತಿ ಟಿಕೇಟು ದರದಲ್ಲಿ ವೀಕ್ಷಿಸಬಹುದಾಗಿದೆ. ಶಾಲಾ- ಕಾಲೇಜು ವಿದ್ಯಾರ್ಥಿಗಳು, ಸಾರ್ವಜನಿಕರು ಈ ಉತ್ತಮ ಸಂದೇಶ ಸಾರುವ ಸಿನಿಮಾವನ್ನು ವೀಕ್ಷಿಸುವಂತೆ ಆಯೋಜಕರು ಕೋರಿದ್ದಾರೆ.