ಇಸ್ಪೀಟ್‌, ಓಸಿ ದಂಧೆಗೆ ತೀರ್ಥಹಳ್ಳಿ ತತ್ತರ
ಒಂದಿಬ್ಬರು ಪೊಲೀಸರು ಭಾಗಿ
ಪೊಲೀಸರ ಜಾಣ ನಿದ್ದೆ - ಕುಟುಂಬಗಳಲ್ಲಿ ಕಣ್ಣೀರು
ಬೆಳೆದು ನಿಂತಿತೇ ದಂಧೆ - ಕೋಟ್ಯಾಂತರ ರೂ ವ್ಯವಹಾರ
ಆರಗ ಜ್ಞಾನೇಂದ್ರ ಅವರಿಗೆ ಮಹತ್ವದ ಗೃಹಸಚಿವ ಸ್ಥಾನ ದೊರಕಿದಾಗ ದಂಧೆಗಳಿಗೆಲ್ಲ ಕಡಿವಾಣ ಬೀಳಬಹುದು ಎಂಬ ನಿರೀಕ್ಷೆ ಸಾರ್ವಜನಿಕರಲ್ಲಿತ್ತು. ಆದರೆ ದಂಧೆ ಮಾತ್ರ ನಿಲ್ಲದೆ ನಾಗಾಲೋಟದಲ್ಲಿ ಸಾಗುತ್ತಿರುವುದು ಆರಗ ಜ್ಞಾನೇಂದ್ರರವರಿಗೆ ಮುಜುಗರದ ಸಂಗತಿಯೆ. ಇಸ್ಪೀಟು, ಓಸಿ ದಂಧೆಯಲ್ಲಿ ತೊಡಗಿರುವ ಅನೇಕರು ಕಾನೂನಿನ ಮುಲಾಜಿಲ್ಲದಂತಿದ್ದಾರೆ. ಆರಗ ಇತ್ತ ಒಮ್ಮೆ ಚಿತ್ತ ಹರಿಸಿದರೆ ನೂರಾರು ಕುಟುಂಬಗಳ ಕಣ್ಣೀರು ಒರೆಸಲು ಸಾಧ್ಯವಿದೆ. ಸಚಿವ ಆರಗ ಜ್ಞಾನೇಂದ್ರ ಈ ನಿಟ್ಟಿನಲ್ಲಿ ಗಮನ ಹರಿಸುತ್ತಾರೆ ಎಂಬ ನಂಬಿಕೆ ಸಾರ್ವಜನಿಕರಲ್ಲಿ ಇನ್ನೂ ಇದೆ.
ಪೊಲೀಸರ ಗಾಢ ನಿದ್ದೆ ಪರಿಣಾಮ ಇತ್ತೀಚಿನ ವರ್ಷಗಳಲ್ಲಿ ತೀರ್ಥಹಳ್ಳಿ ಸಮಾಜ ಬಾಹಿರ ಕೃತ್ಯದ ದಂಧೆಗಳ ತವರೂರಾಗಿ ಪರಿವರ್ತನೆ ಆದಂತಿದೆ. ಸಾಹಿತ್ಯ, ಹೋರಾಟ ಕ್ಷೇತ್ರಗಳಲ್ಲಿ ರಾಷ್ಟ್ರಮಟ್ಟದಲ್ಲಿ ಪ್ರಖರವಾಗಿ ಗುರುತಿಸಿಕೊಂಡ ತೀರ್ಥಹಳ್ಳಿಗೆ ದಂಧೆಯ ಕೃತ್ಯಗಳು ಕಪ್ಪು ಚುಕ್ಕೆ ಅಂಟಿಸಿದಂತೆ ಮಾಡಿದೆ. ಪೊಲೀಸರು ಖಡ್ಡಕ್‌ ಆಗಿ ಕೆಲಸ ಮಾಡಿದರೆ ದಂಧೆಗಳನ್ನು ಸುಲಭವಾಗಿ ನಿಯಂತ್ರಿಸಬಹುದು. ಆದರೆ ಪೊಲೀಸರು ಖಡಕ್‌ ಕೆಲಸದಂತ್ತ ನಿಗಾ ವಹಿಸಿಲ್ಲ ಎಂಬ ದೂರು ಸಾರ್ವಜನಿಕರಿಂದ ಪದೇ ಪದೇ ಕೇಳಿ ಬರುತ್ತಲೇ ಇದೆ.
ಕಮ್ಮರಡಿ, ಗುಡ್ಡೇಕೇರಿ, ಮೇಗರವಳ್ಳಿ, ಕೈಮರ, ರಂಜದಕಟ್ಟೆ,
ಬಸವಾನಿ, ಕಟ್ಟೇಹಕ್ಕಲು, ದೇವಂಗಿ, ಬೆಜ್ಜವಳ್ಳಿ, ಮಂಡಗದ್ದೆ, ಹಣಗೆರೆ, ಕನ್ನಂಗಿ, ಕೋಣಂದೂರು, ಹೆದ್ದೂರು,
ನೊಣಬೂರು, ಆಗುಂಬೆ, ತೀರ್ಥಹಳ್ಳಿ ಪಟ್ಟಣ ಸೇರಿದಂತೆ ಅನೇಕ ಪ್ರಮುಖ ಊರುಗಳಲ್ಲಿ ಇಸ್ಪೀಟ್‌, ಓಸಿ ದಂಧೆ
ನಡೆಯುತ್ತಿರುವ ಕುರಿತು ಸಾರ್ವಜನಿಕವಾಗಿ ದೂರಿದ್ದರು ಬೀಟ್‌ ಪೊಲೀಸರ ಕಾರ್ಯಾಚರಣೆ ಮಾತ್ರ ವಿಫಲ ಹಾದಿ
ಹಿಡಿದಂತಿದೆ.
ಜಿಲ್ಲೆ, ಹೊರಜಿಲ್ಲೆಗಳ ಕೆಲವರು ಇಸ್ಪೀಟ್‌ ದಂಧೆಯಲ್ಲಿ ತೊಡಗಿದ್ದು ಕೋಟ್ಯಾಂತರ ರೂಪಾಯಿ ವಹಿವಾಟು ನಡೆಯುತ್ತಿದೆ. ಓಸಿ ಬಿಡ್ಡಿಂಗ್‌ ಲಕ್ಷಾಂತರ ರೂಪಾಯಿಯಲ್ಲಿದೆ. ಕೀ ಪ್ಯಾಡ್‌ ಮೊಬೈಲ್‌ ನಲ್ಲಿ ಓಸಿ ಬಿಡ್ಡಿಂಗ್‌ ನ ವಹಿವಾಟು ನಡೆಯುತ್ತಿದೆ ಎಂಬ ರಹಸ್ಯ ಸಂಗತಿ ಆಡಳಿತದ ಗಮನದಲ್ಲಿದ್ದರೂ ಕ್ರಮ ಮಾತ್ರ ಜರುಗಿಸುತ್ತಿಲ್ಲ ಎಂಬ ಆರೋಪ ಇದೆ.