ಒಂದೇ ಅವಧಿಯಲ್ಲಿ
ಬಿಜೆಪಿ ಬೆಂಬಲಿತ 6ನೇ ಅಧ್ಯಕ್ಷೆ
ಅಧ್ಯಕ್ಷರ ಸೀಟ್
ಹಂಚಿ.. ಹಂಚಿ.. ಸುಸ್ತಾದ ಬಿಜೆಪಿ
ಕುಡುಮಲ್ಲಿಗೆ ಗ್ರಾಮ
ಪಂಚಾಯತಿ ನೂತನ ಅಧ್ಯಕ್ಷರಾಗಿ ಬಿಜೆಪಿ ಬೆಂಬಲಿತ ಪದ್ಮ ಆನಂದ್ ಸೋಮವಾರ ಆಯ್ಕೆಯಾಗಿದ್ದಾರೆ. ಗ್ರಾಮ
ಪಂಚಾಯಿತಿ ಆಡಳಿತ ಕೇವಲ ಎರಡು ತಿಂಗಳು ಮಾತ್ರ ಉಳಿದಿದ್ದು ಕಡಿಮೆ ಸಮಯವಿರುವಾಗ ಅಧ್ಯಕ್ಷರನ್ನು ಆಯ್ಕೆ
ಮಾಡಲಾಗಿದೆ. ಚುನಾವಣಾಧಿಕಾರಿಯಾಗಿ ಕೃಷಿ ಅಧಿಕಾರಿ ಕೌಶಿಕ್ ಕಾರ್ಯ ನಿರ್ವಹಿಸಿದ್ದಾರೆ.
ಒಟ್ಟು 10 ಸದಸ್ಯ ಬಲದ ಗ್ರಾಮ ಪಂಚಾಯಿತಿಯಲ್ಲಿ ಪ್ರಸ್ತುತ ಅವಧಿಯಲ್ಲಿ ಒಟ್ಟು 6 ಬಿಜೆಪಿ, 4 ಕಾಂಗ್ರೆಸ್ ಬೆಂಬಲಿತ ಸದಸ್ಯರಿದ್ದಾರೆ. ಈಗಾಗಲೇ ಸರತಿಯಾಗಿ ಸುಮಂಗಲಾ ನಾಗಭೂಷಣ, ಮಮತಾ ಮೋಹನ್, ರಾಜೇಶ ಬಿ.ಎಂ, ಮಂಜುನಾಥ ಶೆಟ್ಟಿ, ಹರೀಶ ಹೆಚ್.ಎಂ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸಿದ್ದಾರೆ.
ಪದ್ಮಾ ಆನಂದ್ 6ನೇ
ಅಧ್ಯಕ್ಷರಾಗಿ ಆಯ್ಕೆಯಾಗಿರುವುದು ವಿಶೇಷ. 7-8 ತಿಂಗಳುಗಳಿಗೆ ಅಧ್ಯಕ್ಷರ ಆಯ್ಕೆ ಪ್ರಕ್ರಿಯೆ ನಡೆದಿದ್ದು
ಪಂಚಾಯಿತಿ ವ್ಯಾಪ್ತಿಯಲ್ಲಿ ಯಾವುದೇ ಅಭಿವೃದ್ಧಿ ಕಾರ್ಯ ನಡೆಯುತ್ತಿಲ್ಲ ಎಂಬ ಆರೋಪ ಕೇಳಿ ಬಂದಿದೆ.
ಕೇವಲ ಅಧ್ಯಕ್ಷರ ಬದಲಾವಣೆಯಲ್ಲೇ ಬಹುಪಾಲು ಆಡಳಿತ ಯಂತ್ರ ಸ್ಥಗಿತಗೊಳಿಸಲಾಗಿದೆ ಎಂಬ ದೂರುಗಳು ಇವೆ.
ಶಿಸ್ತಿನ ಪಕ್ಷ ಬಿಜೆಪಿಯಲ್ಲಿ
ಇತ್ತೀಚೆಗೆ ಪಕ್ಷದ ಶಿಸ್ತುಗಳ ಮರೆಯಾಗುತ್ತಿದೆ. ಕುಡುಮಲ್ಲಿಗೆ ಗ್ರಾಮ ಪಂಚಾಯಿತಿ 6 ಜನ ಬಿಜೆಪಿ ಬೆಂಬಲಿತ
ಸದಸ್ಯರನ್ನು ಸಮಾಧಾನ ಮಾಡುವುದರಲ್ಲಿಯೇ ಪಕ್ಷಕ್ಕೆ ಹಿನ್ನಡೆಯಾಗಿದೆ. ಒಬ್ಬರನ್ನು ಸಮಾಧಾನ ಮಾಡಿದರೆ
ಮತ್ತೊಬ್ಬರು ಸಿಡಿದು ಸಿಲ್ಲುತ್ತಿದ್ದಾರೆ. ಎಲ್ಲರಿಗೂ ಅಧ್ಯಕ್ಷ ಸ್ಥಾನ ಹಂಚುವ ನಿಟ್ಟಿನಲ್ಲಿ ವಿವಿಧ
ಕಸರತ್ತುಗಳನ್ನು ನಡೆಸಿರುವ ಬಿಜೆಪಿ ಪಕ್ಷ ಮತ್ತು ಮುಖಂಡರು ಸುಸ್ತಾಗಿದ್ದಾರೆ ಎಂಬ ಅಭಿಪ್ರಾಯ ಕೇಳಿ
ಬರುತ್ತಿದೆ.