ಕರ್ನಾಟಕ ಕ್ರೀಡಾ ರತ್ನ ಪ್ರಶಸ್ತಿ ಪುರಸ್ಕೃತ ವಿನಯ್‌
ಸಾವಿಗೆ ಖಾಸಗಿ ನರ್ಸಿಂಗ್‌ ಹೋಂ ವೈದ್ಯರ ಬೇಜಾವಾಬ್ದಾರಿ ಕಾರಣವಾಯಿತೇ…?
ಸಾರ್ವಜನಿಕ ವಲಯದಲ್ಲಿ ಭುಗಿಲೆದ್ದ ಆಕ್ರೋಶ
ಖಾಸಗಿ ಅಸ್ಪತ್ರೆ ಸೇರಲು ಸರ್ಕಾರಿ ವೈದ್ಯರ ಶಿಫಾರಸ್ಸು..!
ವಿನಯಕುಮಾರ್‌ ಜ್ವರ ಪೀಡಿತರಾಗಿ ನರ್ಸಿಂಗ್‌ ಹೋಮಿಗೆ ದಾಖಲಾಗುವಾಗ ವೈದ್ಯರು ಸರಿಯಾದ ಸಲಹೆ ನೀಡಿದ್ದರೆ ಖಂಡಿತವಾಗಿ ಬದುಕುವ ಸಾಧ್ಯತೆ ಹೆಚ್ಚಿತ್ತು ಎಂಬ ನೋವು ವಿನಯ್‌ ಅವರ ಗೆಳೆಯರಲ್ಲಿ ಕಾಡುತ್ತಿದೆ. ಅಚ್ಚರಿ ಸಂಗಂತಿ ಎಂದರೆ ಸರ್ಕಾರಿ ಆಸ್ಪತ್ರೆಯ ಕೆಲ ವೈದ್ಯರೂ ಕೂಡ ಚಿಕಿತ್ಸೆ ಸಂದರ್ಭದಲ್ಲಿ ಈ ಖಾಸಗಿ ಆಸ್ಪತ್ರೆಯಲ್ಲೇ ಸೇರಿಕೊಳ್ಳುವಂತೆ ಶಿಫಾರಸ್ಸು ಮಾಡುವಂತ ಪ್ರವೃತ್ತಿ ಹೊಂದಿದ್ದಾರೆ ಎಂಬ ದೂರು ಸಾರ್ವಜನಿಕವಾಗಿದೆ. ವಿನಯ್‌ ಸಾವಿನ ಪ್ರಕರಣ ಸರ್ಕಾರಿ ವೈದ್ಯರೂ ಎಚ್ಚರದಿಂದ ಇರುವಂತೆ ಮಾಡಿದೆ.
ವಿನಯಕುಮಾರ್‌ ಅಕಾಲಿಕ ಮರಣಕ್ಕೀಡಾಗಿರುವುದು ಆತನ ಸ್ನೇಹವಲಯಕ್ಕೆ ದಿಗ್ಬ್ರಮೆ ತಂದಿದೆ. ಸಾಮಾಜಿಕ ಜಾಲತಾಣದಲ್ಲಿ ನಿರಂತರವಾಗಿ ಆತನ ಸ್ನೇಹಿತರು ತೀವ್ರ ಶೋಕ ವ್ಯಕ್ತಪಡಿಸುತ್ತಿದ್ದಾರೆ. ಖೋ ಖೋ ಕ್ರೀಡೆಯಲ್ಲಿ ರಾಷ್ಟ್ರಮಟ್ಟದ ಹೆಸರಾಗಿದ್ದ ವಿನಯಕುಮಾರ್‌ ಏಕಲವ್ಯ ಸ್ಪೋರ್ಟ್ಸ್‌ ಕ್ಲಬ್‌ ಸದಸ್ಯರಾಗಿ ರಾಷ್ಟ್ರೀಯ ಖೋಖೋ ತಂಡವನ್ನು ಪ್ರತಿನಿಧಿಸಿದ್ದರು. ಉತ್ತಮ ಪ್ರದರ್ಶನ ನೀಡುವ ಮೂಲಕ ತಂಡದಲ್ಲಿ ಪ್ರಖ್ಯಾತ ಆಟಗಾರರಾಗಿ ಗುರುತಿಸಿಕೊಂಡಿದ್ದರು. ಇವರ ಸಾಧನೆಯನ್ನು ಗಮನಿಸಿ ಕರ್ನಾಟಕ ಸರ್ಕಾರ ಕ್ರೀಡಾ ರತ್ನ ಪ್ರಶಸ್ತಿ ನೀಡಿ ಗೌರವಿಸಿದೆ. ಇತ್ತೀಚೆಗೆ ಉತ್ತರ ಪ್ರದೇಶದಲ್ಲಿ ನಡೆದ ಖೋಖೋ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗೆದ್ದಿದ್ದರು. 2 ವರ್ಷದ ಹಿಂದಷ್ಟೆ ವಿವಾಹವಾಗಿದ್ದು 9 ತಿಂಗಳ ಪುಟ್ಟ ಮಗುವಿದೆ.
ದೈಹಿಕವಾಗಿ ಸದೃಢನಾಗಿದ್ದ ಹಾಗೂ ದಿನನಿತ್ಯ ಫಿಟ್‌ನೆಸ್‌ಗೆ ಸಂಬಂಧಪಟ್ಟ
ಕಸರತ್ತು ಮಾಡುತ್ತಿದ್ದ ವಿನಯ್‌ ವಾರದ ಹಿಂದೆ ಜ್ವರ ಎಂದು ಇಲ್ಲಿನ ಖಾಸಗಿ ನರ್ಸಿಂಗ್‌ ಹೋಂನಲ್ಲಿ
ಚಿಕಿತ್ಸೆಗೆಂದು ಸೇರಿದ್ದರು. ಪ್ರಾಥಮಿಕ ಚಿಕಿತ್ಸೆ ನೀಡಿದ ವೈದ್ಯರು ಬೇಜಾವಾಬ್ದಾರಿಯಿಂದಲೋ ಅಥವಾ
ತಮ್ಮ ಕಾರ್ಯಾಭಾರದ ಒತ್ತಡದಿಂದಲೋ ಇವರ ಖಾಯಿಲೆಯನ್ನು ಸರಿಯಾಗಿ ತಪಾಸಣೆ ಮಾಡದೆ ಉಲ್ಬಣಾವಸ್ಥೆಗೆ ಹೋದ
ನಂತರ ಕೈಚೆಲ್ಲಿ ಮಣಿಪಾಲ ಆಸ್ಪತ್ರೆಗೆ ಕಳಿಸಿದ್ದು ಮತ್ತು ಆ ಹೊತ್ತಿಗಾಗಲೇ ಅದು ಮಿದುಳು ಜ್ವರದ ಸ್ವರೂಪ
ಪಡೆದುಕೊಂಡಿದ್ದು ವಿನಯ್‌ ಸಾವಿಗೆ ಕಾರಣವೆಂದು ಹೇಳಲಾಗುತ್ತಿದೆ. ಸಾಧಾರಣವಾಗಿ ನರ್ಸಿಂಗ್‌ ಹೋಂಗೆ
ಸೇರುತ್ತಲೇ ಹತ್ತಾರು ತರಹದ ಪರೀಕ್ಷೆ ಮಾಡಿಸುತ್ತಾರೆ. ಸರ್ವೆ ಸಾಮಾನ್ಯ ಈ ಭಾಗದಲ್ಲಿ ಕಂಡುಬರುವ ಎಲ್ಲಾ
ರೀತಿಯ ಗಂಭೀರ ಸೋಂಕಿನ ಪರೀಕ್ಷೆಯನ್ನು ಮಾಡಲಾಗುತ್ತದೆ. ಅದೇ ರೀತಿ ವಿನಯ್‌ ಪ್ರಕರಣದಲ್ಲಿ ಆಗಿತ್ತು.
ಹಾಗಿದ್ದಾಗಲೂ ನಿಖರವಾಗಿ ಯಾವ ಕಾಯಿಲೆ ಎಂದು ಕಂಡು ಹಿಡಿಯುವಲ್ಲಿ ಈ ವೈದ್ಯರು ಮಾಡಿದ ಎಡವಟ್ಟು ಈ
ಕ್ರೀಡಾಪಟುವಿನ ಅಮೂಲ್ಯ ಜೀವವನ್ನು ಬಲಿ ಪಡೆಯಿತು ಎಂಬುದು ಸಾರ್ವಜನಿಕವಾಗಿ ಚರ್ಚೆಯಾಗುತ್ತಿದ್ದು
ಈ ಪ್ರಕರಣದ ಕುರಿತು ಸರ್ಕಾರ, ಸಂಬಂಧಪಟ್ಟ ಇಲಾಖೆಗಳು ಗಂಭೀರವಾಗಿ ಗಮನಿಸಬೇಕಾದ ಅವಶ್ಯಕತೆ ಇದೆ.
ಈ ಹಿಂದೆಯೂ ಕೂಡ ಈ ಖಾಸಗಿ ನರ್ಸಿಂಗ್‌ ಹೋಂನಲ್ಲಿ ಇದೇ ರೀತಿಯ ಪ್ರಮಾದಗಳು ಸಂಭವಿಸಿದ್ದು ಅತ್ಯಂತ ಒತ್ತಡದಲ್ಲಿರುವ ಈ ವೈದ್ಯ ತಮ್ಮ ಕರ್ತವ್ಯವನ್ನು ಸರಿಯಾಗಿ ನಿಭಾಯಿಸದೇ ರೋಗಿಗಳ ಜೀವಕ್ಕೆ ಎರವಾಗುತ್ತಿದ್ದಾರೆ ಎಂಬ ಅರೋಪ ವಿನಯ್‌ ಮರಣ ಹೊಂದಿದ ನಂತರ ದೊಡ್ಡ ಮಟ್ಟದಲ್ಲಿ ಕೇಳಿ ಬರುತ್ತಿದೆ.