ಇ-ಶ್ರಮ್ ನೋಂದಾಣಿಯಿಂದ ಮಾಹಿತಿ ಬಹಿರಂಗ

ತಿಂಗಳಿಗೆ 10 ಸಾವಿರಕ್ಕಿಂತ ಕಡಿಮೆ ಆದಾಯ

ದೇಶದಲ್ಲಿ ಅಸಂಘಟಿತ ಕಾರ್ಮಿಕರ ಆದಾಯ ಕುಸಿತ

ಶೇಕಡಾ 74ರಷ್ಟು ದಲಿತ, ಹಿಂದುಳಿದ ಕಾರ್ಮಿಕರು

ಕೋವಿಡ್ ನಂತರ ತೀವ್ರ ಸಂಕಷ್ಟ

ಅಸಂಘಟಿತ ವಲಯದ 27.69 ಕೋಟಿ ಕಾರ್ಮಿಕರು ಕೇಂದ್ರ ಸರ್ಕಾರದ ಇ–ಶ್ರಮ್ ಪೋರ್ಟಲ್‌ನಲ್ಲಿ ನೋಂದಾಯಿತರಾಗಿದ್ದು, ಇವರ ಪೈಕಿ ಶೇಕಡ 94.11ರಷ್ಟು ಮಂದಿಯ ತಿಂಗಳ ಆದಾಯ 10 ಸಾವಿರಕ್ಕಿಂತ ಕಡಿಮೆ. ಅಲ್ಲದೆ, ಇಷ್ಟು ಮಂದಿಯಲ್ಲಿ ಶೇ 74ರಷ್ಟು ಮಂದಿ ದಲಿತರು ಹಾಗೂ ಹಿಂದುಳಿದ ವರ್ಗಗಳಿಗೆ ಸೇರಿದವರಾಗಿದ್ದಾರೆ.

2021ರ ನವೆಂಬರ್‌ ಮಧ್ಯಭಾಗದಲ್ಲಿ ಇ–ಶ್ರಮ್ ಪೋರ್ಟಲ್‌ನಲ್ಲಿ ಅಸಂಘಟಿತ ವಲಯದ 8 ಕೋಟಿ ಕಾರ್ಮಿಕರು ನೋಂದಾಯಿತರಾಗಿದ್ದರು. ಆಗ ತಿಂಗಳಿಗೆ ₹ 10 ಸಾವಿರಕ್ಕಿಂತ ಕಡಿಮೆ ಆದಾಯ ಹೊಂದಿರುವವರ ಪ್ರಮಾಣವು ಶೇ 92.37ರಷ್ಟು ಆಗಿತ್ತು.

ದೇಶದ ಅಸಂಘಟಿತ ವಲಯದಲ್ಲಿ ಒಟ್ಟು 38 ಕೋಟಿ ಕಾರ್ಮಿಕರು ಕೆಲಸ ಮಾಡುತ್ತಿದ್ದಾರೆ ಎಂಬ ಅಂದಾಜು ಇದೆ. ಇಷ್ಟೂ ಜನ ಇ–ಶ್ರಮ್ ಪೋರ್ಟಲ್‌ ನಲ್ಲಿ ನೋಂದಾಯಿತರಾದ ನಂತರ ಸಮಾಜದಲ್ಲಿ ಇರುವ ತೀವ್ರ ಅಸಮಾನತೆಯು ಸ್ಪಷ್ಟವಾಗಿ ಗೊತ್ತಾಗಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ದೇಶದ ಅಸಂಘಟಿತ ವಲಯದ ಕಾರ್ಮಿಕರ ಸಮಗ್ರ ದತ್ತಾಂಶವನ್ನು ರೂಪಿಸುವ ಗುರಿಯನ್ನು ಇ–ಶ್ರಮ್ ಪೋರ್ಟಲ್ ಹೊಂದಿದೆ. 

ಶೇ 4.36ರಷ್ಟು ಮಂದಿಯ ತಿಂಗಳ ಆದಾಯವು 10 ಸಾವಿರದಿಂದ 15 ಸಾವಿರದ ನಡುವೆ ಇದೆ. ಪೋರ್ಟಲ್‌ನಲ್ಲಿ ನೋಂದಣಿ ಆಗಿರುವವರಲ್ಲಿ ಶೇ 45.32ರಷ್ಟು ಮಂದಿ ಒಬಿಸಿ, ಶೇ 20.95ರಷ್ಟು ಮಂದಿ ಎಸ್‌ಸಿ ಹಾಗೂ ಶೇ 8.17ರಷ್ಟು ಮಂದಿ ಎಸ್‌ಟಿ ಸಮುದಾಯಗಳಿಗೆ ಸೇರಿದವರು. ಸಾಮಾನ್ಯ ವರ್ಗಕ್ಕೆ ಸೇರಿದವರ ಪ್ರಮಾಣ ಶೇ 25.56ರಷ್ಟು, ಮಹಿಳೆಯರ ಪ್ರಮಾಣ ಶೇ 52.81, ಪುರುಷರ ಪ್ರಮಾಣ ಶೇ 47.19ರಷ್ಟು ಇದೆ.