ಅಗ್ರಹಾರ ಹೋಬಳಿಯ
ಅಕ್ರಮ ಮರಳು ಕ್ವಾರಿಗಳ ಮೇಲೆ ದಿಟ್ಟ ದಾಳಿ
150ಕ್ಕೂ ಟನ್ಗೂ
ಹೆಚ್ಚು ಅಕ್ರಮ ಮರಳು ವಶಕ್ಕೆ
ಅಕ್ರಮ ಮರಳು ವಹಿವಾಟು
ತೀರ್ಥಹಳ್ಳಿಯಲ್ಲಿ ಭರ್ಜರಿ ಸದ್ದು ಹಾಗೂ ಸುದ್ದಿ ಮಾಡತೊಡಗಿದೆ. ಕಳೆದ ವಾರವಷ್ಟೇ ಮಾಜಿ ಗೃಹ ಸಚಿವ,
ಶಾಸಕ ಆರಗ ಜ್ಞಾನೇಂದ್ರ ಮುಂಡೊಳ್ಳಿ, ದಬ್ಬಣಗದ್ದೆ ಮರಳು ಕ್ವಾರಿಗಳ ಮೇಲೆ ದಾಳಿ ಮಾಡಿದ ರಭಸ ಹೇಗಿತ್ತು
ಎಂದರೆ ಸ್ವತಃ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಮೈಸೂರು ವಿಭಾಗದ ಆಯುಕ್ತೆ ಲಕ್ಷ್ಮಮ್ಮ ಬೆಚ್ಚಿ ಬಿದ್ದು
ಸೀದ ಮುಂಡೊಳ್ಳಿ ಕ್ವಾರಿಗೆ ಬಂದು ಬಿದಿರು ಹಿಂಡಿಲಿನ ಕೆಳಗೆ ಕುಳಿತು ಮದ್ಯಾಹ್ನದ ಬಿರು ಬಿಸಿಲಿನಲ್ಲಿ
ಆರಗ ಜ್ಞಾನೇಂದ್ರರು ವಾಚಮಗೋಚರವಾಗಿ ನಿಂದಿಸಿದ್ದನ್ನು ಅತ್ಯಂತ ವಿನಯದಿಂದ ಸ್ವೀಕರಿಸಿ ಹೆಚ್ಚಿನ ಯಾವ
ಕ್ರಮವನ್ನು ಕೈಗೊಳ್ಳದೆ ಬೀಸುವ ದೊಣ್ಣೆ ತಪ್ಪಿದರೆ ಸಾಕು ಎಂಬಂತೆ ಕಾಲ್ಕಿತ್ತಿದ್ದರು.
ಅಲ್ಲೂ ಕೂಡ ಆರಗ
ಜ್ಞಾನೇಂದ್ರ ತಹಶೀಲ್ದಾರ್ಗೆ 1 ಲಕ್ಷ, ಉಪ ವಿಭಾಗಾಧಿಕಾರಿಗೆ 1 ವರೆ ಲಕ್ಷ, ಮಾಳೂರು ಪೊಲೀಸ್ ಠಾಣೆಗೆ
6 ಲಕ್ಷ, ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಹಿರಿಯ ಭೂ ವಿಜ್ಞಾನಿಗೆ 7 ಲಕ್ಷ ಸೇರಿದಂತೆ ವಿವಿಧ ಪೊಲೀಸ್,
ಅರಣ್ಯ ಇಲಾಖೆ ಸಿಬ್ಬಂದಿ ವರ್ಗಕ್ಕೆ ಅವರವರ ಯೋಗ್ಯತೆಗೆ ತಕ್ಕ ಹಾಗೆ ಮಾಮೂಲಿ ಹಣ ಹೋಗುತ್ತಿದೆ ಎಂದು
ರಾಜಾರೋಷವಾಗಿ ಆರೋಪ ಮಾಡಿದ್ದರು.
ಅದಕ್ಕೆ ಯಾರು ಉತ್ತರ
ನೀಡಿದರೋ ಬಿಟ್ಟರೋ ತಾಲ್ಲೂಕು ದಂಡಾಧಿಕಾರಿ ಮತ್ತು ತಹಶೀಲ್ದಾರ್ ಆಗಿರುವ ರಂಜಿತ್ ಮಾತ್ರ ಮರುದಿನದಿಂದಲೇ
ತೀವ್ರ ಕಾರ್ಯಚರಣೆಗೆ ಇಳಿದಿದ್ದು ಆರಗ ಜ್ಞಾನೇಂದ್ರರ ಮನೆ ಇರುವ ಅಗ್ರಹಾರ ಹೋಬಳಿ ಮತ್ತು ಕಾಂಗ್ರೆಸ್ಸಿಗರು
ತಿಂಗಳಿಗೆ ನಾಲ್ಕು ಬಾರಿಯಾದರು ನೆನಪು ಮಾಡಿಕೊಳ್ಳುವ ಬಿಂತ್ಲಾ ಸುತ್ತಮುತ್ತಲಿನ ಪ್ರದೇಶದಲ್ಲಿ. ಅಂದ
ಹಾಗೆ ಆರಗದ ಗೋಪಿನಾಥ ಹಳ್ಳದಲ್ಲಿ ಭರ್ಜರಿಯಾಗಿ ಮರಳು ದಂಧೆ ನಡೆಯುತ್ತಿರುವುದು ಇಂದು ನಿನ್ನೆಯದಲ್ಲ.
ತೀರ್ಥಹಳ್ಳಿ ತಾಲ್ಲೂಕಿನ ಯಾವ ಕ್ವಾರೆಗಳಲ್ಲಿ ಅಕ್ರಮ ಮರಳು ಸಾಗಾಟ ಆಗುತ್ತದೋ ಅಷ್ಟೇ ನಿರಾಯಾಸವಾಗಿ
ತೊಂದರೆ ರಹಿತವಾಗಿ ಗೋಪಿನಾಥ ಹಳ್ಳದಿಂದಲೂ ಲೋಕಲ್ ಇಂದ ಹಿಡಿದು ಶಿವಮೊಗ್ಗದ ವರೆಗೂ ಮರಳು ಸಾಗಾಟ
ಆಗುತ್ತಿತ್ತು. ಆದರೆ ಈ ಕುರಿತು ಆರಗರು ಪ್ರಸ್ತಾಪ ಮಾಡಿದ್ದು ಕಡಿಮೆ.
ಈಗ ತಹಶೀಲ್ದಾರ್
ರಂಜಿತ್ ಅದೇ ಪ್ರದೇಶಗಳಲ್ಲಿ ದಿಟ್ಟತನದಿಂದ ಮರಳುಗಳ್ಳತನದ ಮೇಲೆ ದಾಳಿ ಮಾಡತೊಡಗಿದ್ದು ಹಲವು ಪ್ರಶ್ನೆಗಳನ್ನು
ಮೂಡಿಸುತ್ತಿರುವ ಜೊತೆಗೆ ಆರಗ ಜ್ಞಾನೇಂದ್ರ ಮತ್ತು ಅಧಿಕಾರಿಗಳ ಜಟಾಪಟಿಯ ನಡುವೆ ಹಳ್ಳಿಗಾಡಿನಲ್ಲಿ
ಗೂಡ್ಸ್ ಆಟೋ, ಪಿಕಪ್ ಮುಂತಾದ ವಾಹನದಲ್ಲಿ ತುರ್ತಾಗಿ ಕಟ್ಟಡ ಕೆಲಸಕ್ಕೆ ಪೂರೈಕೆಯಾಗುತ್ತಿದ್ದ ಮರಳು
ಸಾಗಾಣೆ ಈಗ ನಿಲ್ಲುವ ಹಂತಕ್ಕೆ ಬಂದಿದೆ.