ಪೊಲೀಸ್ ಇಲಾಖೆಯೊಳಗಿನ ‘ಹೋರಾಟಗಾರ’: ಎಸ್ಎಸ್ ಕಾಶಿಗೆ ‘ಸೆಂಡ್ ಆಫ್’!
ಅದರ ನೆಪದಲ್ಲಿ ಹಮ್ಮಿಕೊಂಡ ಖಾಸಗಿ ಕಾರ್ಯಕ್ರಮದ ಉದ್ದಕ್ಕೂ ಇಲಾಖೆಯ ಒಳಗೆ ಕಾಶಿ ನಡೆಸಿದ ಹೋರಾಟಗಳ ಕತೆಯನ್ನು ಮೆಲುಕು ಹಾಕಲಾಯಿತು. ಕಾಶಿ, ಇಲಾಖೆಯ ಸಿಬ್ಬಂದಿಗಳು ಹಾಗೂ ಅಧಿಕಾರಿಗಳ ಪಾಲಿಗೆ ಆಶಾಕಿರಣವೂ ಅಗಿದ್ದಾರೆ ಎಂಬುದನ್ನು ‘ಸೆಂಡ್ ಆಫ್’ ಕೋರಿ ಮಾತನಾಡಿದ ಬಹುತೇಕರು ನಿರೂಪಿಸಿದರು.
ರಾಜ್ಯದ 31 ಜಿಲ್ಲೆಗಳಲ್ಲಿ ಕಾನೂನು ಸುವ್ಯವಸ್ಥೆ ಕಾಪಾಡಲು ಸುಮಾರು 1000 ಪೊಲೀಸ್ ಠಾಣೆಗಳಿವೆ. ಜತೆಗೆ, ತುರ್ತ ಅಗತ್ಯಗಳಿಗಾಗಿ 12 ಕೆಎಸ್ಆರ್ಪಿ ತುಕಡಿಗಳು ಸೇರಿದಂತೆ 6 ಕಮಿಷನರೇಟ್ಗಳಲ್ಲಿ ಒಟ್ಟು ಒಂದು ಲಕ್ಷಕ್ಕೂ ಸಿಬ್ಬಂದಿ ಹಾಗೂ ಅಧಿಕಾರಿಗಳು ಕಾರ್ಯ ನಿರ್ವಹಿಸುತ್ತಿದ್ದಾರೆ. ವಿಶೇಷ ಅಂದರೆ, ಇದರಲ್ಲಿ ಸುಮಾರು 215 ಐಪಿಎಸ್ ಗ್ರೇಡ್ ಅಧಿಕಾರಿಗಳಿದ್ದು, ಉಳಿದವರನ್ನು ನಾನ್ ಐಪಿಎಸ್ ಶ್ರೇಣಿಯಲ್ಲಿದ್ದಾರೆ.
“ಇಲಾಖೆಯ ಒಳಗೆ ಬಹಳ ಹಿಂದಿನಿಂದಲೂ ಐಪಿಎಸ್ ಹಾಗೂ ನಾನ್- ಐಪಿಎಸ್ ನಡುವೆ ಶೀಥಲ ಸಮರ ಜಾರಿಯಲ್ಲಿದೆ. ಹೀಗಾಗಿಯೇ, ಸರಕಾರ ವರ್ಷದ ಆರಂಭದಲ್ಲಿಯೇ ದೊಡ್ಡಮಟ್ಟದಲ್ಲಿ ಸುಧಾರಣೆ ಕೈಗೊಂಡಿತು. ಸುಮಾರು 68 ಐಪಿಎಸ್ ಶ್ರೇಣಿಯ ಅಧಿಕಾರಿಗಳಿಗೆ ಪದೋನ್ನತಿ ನೀಡಿತು. ಜತೆಗೆ 28 ನಾನ್ ಐಪಿಎಸ್ ಸ್ಥಳೀಯ ಅಧಿಕಾರಿಗಳಿಗೆ ಐಪಿಎಸ್ ಶ್ರೇಣಿಗೆ ಪ್ರವೇಶ ನೀಡಲಾಯಿತು. ಇತ್ತೀಚಿನ ವರ್ಷಗಳಲ್ಲಿ ನಡೆದ ಅತಿ ಹೆಚ್ಚಿನ ಪದೋನ್ನತಿ ನೀಡುವ ಪ್ರಕ್ರಿಯೆ ಇದು,’’ ಎನ್ನುತ್ತಾರೆ ವಿ. ಮುರಳೀಧರ್. ಬೆಂಗಳೂರಿನಲ್ಲಿ ಹಲವು ವರ್ಷಗಳ ಕಾಲ ಅಪರಾಧ ವರದಿಗಾರಿಕೆ ಮಾಡಿದ ಅನುಭವ ಮುರಳಿಯವರಿಗಿದೆ.
ಕಾರ್ಯಕ್ರಮವನ್ನು ನಿರೂಪಿಸಿದ, ಇನ್ನೊಬ್ಬ ನಿವೃತ್ತ ಅಧಿಕಾರಿ ಕೆ. ಎನ್. ನಾರಾಯಣ ಸ್ವಾಮಿ ಅವರಿಂದ ಹಿಡಿದು, ಮಾತನಾಡಿದ ಎಲ್ಲಾ ಅಧಿಕಾರಿಗಳು ಒಂದಿಲ್ಲೊಂದು ರೂಪದಲ್ಲಿ ಇಲಾಖೆಯೊಳಗಿನ ತಾರತಮ್ಯವನ್ನು, ಅದಕ್ಕೆ ಕಾಶಿ ನಡೆಸಿದ ಹೋರಾಟವನ್ನು ನೆನಪಿಸಿಕೊಂಡರು; ಒಂದು ಹಂತದಲ್ಲಿ ಕೊಂಡಾಡಿದರು ಕೂಡ.
“ನಮ್ಮ ಬ್ಯಾಚ್ನಲ್ಲಿ ಮೊದಲು ಮುಖ್ಯಮಂತ್ರಿ ಪದಕ ಪಡೆದುಕೊಂಡಿದ್ದು ಕಾಶಿ,’’ ಎಂದು ನೆನಪುಗಳನ್ನು ಅಧಿಕಾರಿಯೊಬ್ಬರು ಮೆಲಕು ಹಾಕಿದರು. ರಾಯಚೂರು ಜಿಲ್ಲೆಯಲ್ಲಿ ನಡೆದ ನಕ್ಸಲ್ ಎನ್ಕೌಂಟರ್ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡ ಕಾರಣಕ್ಕೆ ಲಭ್ಯವಾದ ಸನ್ಮಾನ ಇದು. ಸರಕಾರದ ವಿರುದ್ದದ ಶಸಸ್ತ್ರ ಹೋರಾಟದ ದಮನದ ಕಾರಣಕ್ಕೆ ಸನ್ಮಾನಿತರಾದ ಕಾಶಿ, ತಮ್ಮ ನಿವೃತ್ತಿಯ ಹೊತ್ತಿಗೆ ಇಲಾಖೆಯ ಒಡನಾಡಿಗಳ ಕಣ್ಣಿಗೆ ಹೋರಾಟಗಾರರಾಗಿ ಕಾಣಿಸುತ್ತಿರುವುದೂ ವಿಶೇಷವಾಗಿದೆ.
“ಇಲಾಖೆಯ ನನ್ನ ಸಹಜೀವಿಗಳಿಗೆ ಕಾನೂನು ನೆರವು ನೀಡುವ ಕೆಲಸ ಮಾಡುತ್ತೇವೆ,’’ ಎಂದು ತಮ್ಮ ನಿವೃತ್ತ ಜೀವನದ ಯೋಜನೆಯನ್ನು ಮುಂದಿಟ್ಟ ಕಾಶಿ, ಇತ್ತೀಚಿಗೆ ಕಾನೂನು ಪದವಿಯನ್ನೂ ಮುಗಿಸಿದ್ದಾರೆ.