ಅಕ್ಟೋಬರ್ 8 ರಂದು ಬೆಂಗಳೂರಿನ ಇಲಾಖಾ ಕಚೇರಿಯಲ್ಲಿ ವಿಚಾರಣೆ
ಸಹಕಾರ ಸಚಿವ ಲಕ್ಷ್ಮಣ ಸವದಿ – ಶೃಂಗೇರಿ ಶಾಸಕ ಟಿ.ಡಿ.ರಾಜೇಗೌಡರ ಪತ್ರ ಗಂಭೀರವಾಗಿ ಪರಿಗಣಿಸಿದ
ಇಲಾಖೆ
ಇತ್ತೀಚೆಗೆ ಮಲೆನಾಡು ಅಡಿಕೆ ಮಾರಾಟ ಸಹಕಾರ ಸಂಘ ಶಿವಮೊಗ್ಗ (ಮ್ಯಾಮ್ಕೋಸ್)
ಹೊದಲ-ಅರಳಾಪುರ ಗ್ರಾಮ ಪಂಚಾಯಿತಿಯ ಯಡೇಹಳ್ಳಿ ಗ್ರಾಮದಲ್ಲಿ ಗೋದಾಮು ನಿರ್ಮಾಣಕ್ಕೆಂದು ಖರೀದಿಸಿದ
ಜಾಗ ವ್ಯಾಪಕ ಚರ್ಚೆಗೀಡಾಗಿತ್ತಲ್ಲದೇ ಷೇರುದಾರರ ಅಸಮಾಧಾನಕ್ಕೂ ಗುರಿಯಾಗಿತ್ತು.
ಸಹಕಾರ ಸಚಿವ ಲಕ್ಷ್ಮಣ ಸವದಿ ಮತ್ತು ಶೃಂಗೇರಿ ಶಾಸಕ ರಾಜೇಗೌಡರ ಪತ್ರದ ಆಧಾರದ ಮೇಲೆ ಸಹಕಾರ ಇಲಾಖೆ
ಅಕ್ಟೋಬರ್ 8 ರಂದು ವಿಚಾರಣೆಗೆ ಹಾಜರಾಗುವಂತೆ ಮ್ಯಾಮ್ಕೋಸ್ಗೆ ನೋಟೀಸ್ ನೀಡಿದೆ.
ದೂರು ಪತ್ರಗಳಲ್ಲಿ ಇದೊಂದು ಅಸಹಜ ಖರೀದಿ ಪ್ರಕ್ರಿಯೆಯಾಗಿದ್ದು ತೀರ್ಥಹಳ್ಳಿಯ ಭಾಗದಲ್ಲಿ ಎಲ್ಲೂ
ಇಲ್ಲದ ದರವನ್ನು ಷೇರುದಾರರ ಹಣದಿಂದ ನೀಡುವ ಪ್ರಮಾದ ನಡೆದಿದೆ. ಕೇವಲ 62 ಸಾವಿರ ಅಡಿಗೆ 7 ಕೋಟಿಗಿಂತಲೂ
ಹೆಚ್ಚಿನ ಹಣವನ್ನು ಖರೀದಿಗಾಗಿ ಖರ್ಚು ಮಾಡಲಾಗಿದೆ. ತಾಂತ್ರಿಕವಾಗಿ ತೊಂದರೆ ಆಗಬಾರದು ಎಂಬ ಕಾರಣಕ್ಕಾಗಿ
2 ಕೋಟಿ ಮುದ್ರಾಂಕ ಶುಲ್ಕ ಪಾವತಿ ಮಾಡಲಾಗಿದೆ ಎಂದು ಆರೋಪಗಳಿದ್ದವು.
ಅಲ್ಲದೇ ಈ ಕುರಿತು ಆರಂಭದಿಂದಲೇ ಧ್ವನಿ ಎತ್ತಿದ್ದ ಕಡ್ತೂರು ದಿನೇಶ್ ಸಮರ್ಪಕವಾದ ಜಾಹೀರಾತು
ನೀಡದೆ ಹಾಗೂ ವ್ಯಾಪಕ ಚರ್ಚೆಯನ್ನು ಮಾಡದೆ ಈ ಜಾಗವನ್ನು ಖರೀದಿ ಮಾಡುವ ಮೂಲಕ ದೊಡ್ಡ ಅವ್ಯವಹಾರ ನಡೆದಿದೆ.
ಈ ಖರೀದಿ ಒಪ್ಪಂದವನ್ನು ಅಮಾನತ್ತಿನಲ್ಲಿಟ್ಟು ಉಪಾಧ್ಯಕ್ಷ ಮತ್ತು ಅಧ್ಯಕ್ಷರುಗಳಿಂದ ಹಣವನ್ನು ಮರು
ಪಾವತಿ ಮಾಡಿಸಿಕೊಳ್ಳಬೇಕೆಂದು ದೂರು ನೀಡಿದ್ದರು.
ಅಲ್ಲದೇ ಸಹಕಾರ ಭಾರತಿಯ ಪ್ರಮುಖ ಹಿರಿಯ ಸಹಕಾರಿ ಸಿ.ಬಿ.ಈಶ್ವರ್ ಈ ಖರೀದಿ ಪ್ರಕ್ರಿಯೆ ವಿರುದ್ಧ
ಮಾಧ್ಯಮಗಳಲ್ಲಿ ಪತ್ರ ಬರೆದು ಸತ್ಯಕ್ಕಾಗಿ ಆಗ್ರಹಿಸಿದಾಗ ಇದು ಮತ್ತಷ್ಟು ಚರ್ಚೆಗೀಡಾಗಿತ್ತು. ಈ ದೂರಿನೊಂದಿಗೆ
ಇಲ್ಲಿಯವರೆಗೆ ಮೇಲ್ನೋಟಕ್ಕಾದರು ಎಲ್ಲವು ಸರಿಯಿದ್ದಂತೆ ಕಾಣುತ್ತಿದ್ದಂತೆ ಕಾಣುತ್ತಿದ್ದ ಮ್ಯಾಮ್ಕೋಸ್
ಈಗ ಇಲಾಖಾ ವಿಚಾರಣೆಯ ಅಪಖ್ಯಾತಿಯನ್ನು ಎದುರಿಸಿದೆ. ಫಲಿತಾಂಶ ಏನಾಗಬಹುದೆಂದು ಸಹಕಾರ ವಲಯ ಕುತೂಹಲದಿಂದ
ನಿರೀಕ್ಷಿಸುತ್ತಿದೆ.