ಮತ ಎಣಿಕೆ ಸಿಸಿಟಿವಿ ದೃಶ್ಯ ಲಭ್ಯವಿಲ್ಲ ಎಂದು ಚುನಾವಣಾ ಆಯೋಗ ಸಬೂಬು
ಒಪ್ಪದ ಸುಪ್ರಿಂ ಕೋರ್ಟ್ ನಿಂದ ಕಾನೂನು ಕ್ರಮದ ಎಚ್ಚರಿಕೆ
ಚುನಾವಣಾ ಆಯೋಗದ ವಿರುದ್ಧ ರಾಷ್ಟ್ರವ್ಯಾಪಿ ಅಸಮಧಾನ ಮತ್ತು ಪ್ರಶ್ನೆಗಳ ಮೇಲೆ ಪ್ರಶ್ನೆಗಳ ಸುರಿಮಳೆಯ
ದಾಳಿ ವಿಪಕ್ಷಗಳಿಂದ ನಡೆಯುತ್ತಿದ್ದಂತೆಯೇ ಶೃಂಗೇರಿ ವಿಧಾನಸಭಾ ಕ್ಷೇತ್ರದ ಚುನಾವಣಾ ಫಲಿತಾಂಶ ರಾಷ್ಟ್ರವ್ಯಾಪಿ
ಸದ್ದು ಮಾಡಿದೆ. ಕೆಲ ಸಮಯದಿಂದ ಹಾವು ಏಣಿಯಾಟದಂತೆ ಒಮ್ಮೆ ಹಾಲಿ ಶಾಸಕ ಟಿ.ಡಿ.ರಾಜೇಗೌಡ ಹಾಗೂ ಇನ್ನೇನು
ರಾಜೇಗೌಡರ ಶಾಸಕ ಸ್ಥಾನ ಹೊರಟು ಹೋಗಿ ಡಿ.ಎನ್.ಜೀವರಾಜ್ ಶಾಸಕರಾಗೇ ಬಿಟ್ಟರು ಎನ್ನುವ ಮಟ್ಟಿಗೆ ಸಿನಿಮೀಯ
ದೃಶ್ಯಗಳು ಈ ಕ್ಷೇತ್ರದ ಚುನಾವಣಾ ಫಲಿತಾಂಶಕ್ಕೆ ಸಾಕ್ಷಿಯಾಗಿದ್ದವು.
2023ರ ವಿಧಾನಸಭಾ
ಚುನಾವಣೆಯಲ್ಲಿ ರಾಜೇಗೌಡ ಅವರು ಬಿಜೆಪಿಯ ಡಿ.ಎನ್. ಜೀವರಾಜ್ ಅವರನ್ನು 201 ಮತಗಳಿಂದ
ಸೋಲಿಸಿದ್ದರು. 1,811 ಅಂಚೆ ಮತಗಳು
ಚಲಾವಣೆಯಾಗಿದ್ದವು. ಆದರೆ ಫಲಿತಾಂಶದ ವಿರುದ್ಧ ಜೀವರಾಜ್ ಹೈಕೋರ್ಟ್‌ನಲ್ಲಿ ಚುನಾವಣಾ ತಕರಾರು ಅರ್ಜಿ ಸಲ್ಲಿಸಿ ಮರು
ಎಣಿಕೆಗೆ ವಿನಂತಿಸಿದ್ದರು. ವಿಚಾರಣೆ ಬಳಿಕ ಹೈಕೋರ್ಟ್‌ ಅಂಚೆ ಮತಗಳ ಮರು ಎಣಿಕೆಗೆ ಆದೇಶ ನೀಡಿತ್ತು.
ಆ ಪ್ರಕಾರ ಇತ್ತೀಚೆಗೆ ಅಂಚೆ ಮತಗಳ ಮರು ಮತ ಎಣಿಕೆ ನಡೆಸಲಾಗಿ 2023ರಲ್ಲಿ ಸಿಂಧುವಾಗಿದ್ದ 1,540 ಮತಗಳಲ್ಲಿ 255 ಮತಗಳು ಮರು ಎಣಿಕೆ
ವೇಳೆ ಅಸಿಂಧು ಎಂದು ಘೋಷಣೆಯಾದ ಕಾರಣ 52 ಮತಗಳ
ಮುನ್ನಡೆ ಸಾಧಿಸಿದ್ದ ಜೀವರಾಜ್ ಅವರನ್ನು ಚುನಾಯಿತ ಎಂದು ಘೋಷಿಸುವ ಮೂಲಕ ಶಾಸಕರಾಗಿದ್ದ
ರಾಜೇಗೌಡರಿಗೆ ಹಿನ್ನಡೆಯಾಗಿತ್ತು. ಇದನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್
ಮೆಟ್ಟಿಲೇರಿದ್ದ ಕಾರಣ ಶಾಸಕರನ್ನಾಗಿ ರಾಜೇಗೌಡ ಅವರನ್ನು ಸುಪ್ರೀಂ
ಕೋರ್ಟ್ ಮರುಸ್ಥಾಪಿಸಿತ್ತು.
ಫಲಿತಾಂಶದ ವಿರುದ್ಧ ಟಿ.ಡಿ.ರಾಜೇಗೌಡ ಸಲ್ಲಿಸಿದ್ದ ವಿಶೇಷ ಮೇಲ್ಮನವಿ ಅರ್ಜಿ ವಿಚಾರಣೆ ನಿನ್ನೆ
ನಡೆದಿದ್ದು ಸುಪ್ರಿಂ ಕೋರ್ಟ್ ಚುನಾವಣಾ ಆಯೋಗವನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದೆ. ಕಾರಣ
ಮರು ಮತ ಎಣಿಕೆಯ ವಿಡಿಯೋವನ್ನು ನ್ಯಾಯಾಲಯಕ್ಕೆ ಸಲ್ಲಿಸಲಾಗಿದೆ. ಆದರೆ, 2023ರ ಮತ ಎಣಿಕೆಯ ವಿಡಿಯೋ
ಲಭ್ಯವಾಗುತ್ತಿಲ್ಲ ಎಂದು
ಚುನಾವಣಾ ಆಯೋಗದ ವಕೀಲರು ಹೇಳಿದಾಗ ಅದನ್ನು ಒಪ್ಪದ ನ್ಯಾಯಮೂರ್ತಿ ಸಂಜಯ್‌ ಕುಮಾರ್‌ ಹಾಗೂ ಸಂಜೀವ್‌ ಸಚ್‌ದೇವ್‌
ಅವರ ಪೀಠ ಇದು ನಿಮ್ಮ ಕೆಲಸ. ಮೂಲ ವಿಡಿಯೋ ಎಲ್ಲಿ? ಆ ವಿಡಿಯೋ ಲಭ್ಯವಿಲ್ಲ ಎಂದರೆ ಏನರ್ಥ ಎಂದು ಪ್ರಶ್ನಿಸಿದೆ.
ಸಂಬಂಧಪಟ್ಟ ಅಧಿಕಾರಿಗಳು ವರ್ಗಾವಣೆಯಾಗಿರುವುದರಿಂದ ದಾಖಲೆಗಳನ್ನು ಒದಗಿಸುವುದು
ಕಷ್ಟವಾಗುತ್ತಿದೆ
ಎಂದು ವಕೀಲರು ವಾದಿಸಿದರು. ಈ ವಾದವನ್ನು ಪೀಠ ಒಪ್ಪಲಿಲ್ಲ. ಇಂತಹ ನೆಪಗಳನ್ನು ಹೇಳಕೂಡದು
ಅಗತ್ಯ ದಾಖಲೆಗಳನ್ನು ಸಲ್ಲಿಸದೇ ಹೋದಲ್ಲಿ ಚುನಾವಣಾ ಆಯೋಗದ ವಿರುದ್ಧವೇ ಪ್ರತಿಕೂಲ ಅಭಿಪ್ರಾಯ ದಾಖಲಿಸಬೇಕಾಗುತ್ತದೆ
ಎಂದು ಎಚ್ಚರಿಕೆ ನೀಡಿದೆ. ಮುಂದಿನ ವಿಚಾರಣೆ ಫೆಬ್ರವರಿ 15ಕ್ಕೆ ನಡೆಯಲಿದೆ.