ಷೇರುದಾರರ ಪ್ರಶ್ನೆಗಳಿಗೆ ಗದ್ದಲ, ಹಾರಿಕೆಯೇ ಉತ್ತರ
ಅಡಿಕೆ ತುಂಬಿದ ಮೂರು ಲಾರಿ ಎಲ್ಲೋಯ್ತು ? -ಸಿ.ಬಿ.ಈಶ್ವರ್
ಅಕ್ರಮ ಸಾಬೀತಾದರೆ ಹಣ ವಾಪಾಸ್ಸು ಕಟ್ತೀರಾ - ಕಡ್ತೂರು ದಿನೇಶ್
ಮ್ಯಾಮ್ಕೋಸ್ ಇತ್ತೀಚೆಗೆ ತೀರ್ಥಹಳ್ಳಿಯ ಕಿತ್ತನಗದ್ದೆಯಲ್ಲಿ ಒಂದು ಎಕರೆ ಜಮೀನು 7ವರೆ ಕೋಟಿಗೆ ಖರೀದಿಸಿತ್ತು. ಅದಾದ ಬಳಿಕ ಸಹಕಾರ ಭಾರತಿಯ ಪ್ರಮುಖರಿಂದಲೇ ವ್ಯಾಪಕ ಟೀಕೆಗೊಳಗಾದ ಹಿನ್ನಲೆಯಲ್ಲಿ ಸಭೆಯ ಕುತೂಹಲ ಹೆಚ್ಚಾಗಿತ್ತು. ಇದೇ ಪ್ರಶ್ನೆಯನ್ನು ಮುಂದುವರೆಸಿದ ಅನೇಕರು ಈಗಾಗಲೇ ಪಾಲಿಟೆಕ್ನಿಕ್ ಕಾಲೇಜು ಸಮೀಪ ದುರ್ಗಾ ಕ್ರಾಸ್ ನಲ್ಲಿರುವ ಎಪಿಎಂಸಿ ಮಾರುಕಟ್ಟೆಯಲ್ಲಿ ಮ್ಯಾಮ್ ಕೋಸ್ ಗಾಗಿ ಒಂದು ಎಕರೆ ಜಾಗ ಮೀಸಲಿರಿಸಲಾಗಿದೆ. ಅದನ್ನು ಯಾಕೆ ಬಳಕೆ ಮಾಡಿಕೊಳ್ಳಲಿಲ್ಲ ಎಂಬ ಹೊಸ ಚರ್ಚೆಯೊಂದನ್ನು ಹುಟ್ಟುಹಾಕಿದರು.
ಕಿತ್ತನಗದ್ದೆಯ ಏಕನಿವೇಶನ ಕನ್ ವರ್ಷನ್ ಮಾಡಿದ ಹಿನ್ನಲೆಯಲ್ಲಿ ದುಬಾರಿ ಬೆಲೆ ಕೊಟ್ಟಿದ್ದೇವೆ ಎಂದು ಹೇಳಿರುವ ಆಡಳಿತ ಮಂಡಳಿಗೆ ಪ್ರಶ್ನೆ ಮಾಡಿ ಕನ್ ವಷನ್ ಭೂಮಿಗೆ ಮಾಡಿದರೆ ಸಾಲದು ಅದಕ್ಕೆ ರಸ್ತೆ, ಕುಡಿಯುವ ನೀರು, ವಿದ್ಯುತ್ ಸೌಲಭ್ಯಗಳನ್ನು ಮಾಡಿಕೊಡಬೇಕಾಗುತ್ತದೆ. ಈಗ ಮ್ಯಾಮ್ಕೋಸ್ ಅದಕ್ಕಾಗಿ ಹೆಚ್ಚುವರಿ ಹಣ ಮೀಸಲಿಡಬೇಕಾಗುತ್ತದೆ. ಆಗ ಕೇವಲ ಭೂಮಿಯ ವೆಚ್ಚವೇ ಹೆಚ್ಚಾಗಿ ನಷ್ಟ ಆಗುವುದಿಲ್ಲವೇ ಎಂದಾಗ ಷೇರುದಾರನ ವೇಷದಲ್ಲಿ ಅಲ್ಲಿಗೆ ಬಂದಿದ್ದ ವೃದ್ಧ ರಿಯಲ್ ಎಸ್ಟೇಟ್ ವ್ಯಾಪಾರಿ ಒಬ್ಬರು ಅಲ್ಲಿ 2000 ಬೆಲೆ ಇದೆ ಒಂದು ಸಾವಿರಕ್ಕೆ ನಾನೇ ಕೊಳ್ಳುತ್ತೇನೆ ಎಂದು ಘೋಷಿಸಿ ಸ್ವಪಕ್ಷಿಯರಿಂದಲೇ ತೀವ್ರ ಟೀಕೆಗೆ ಗುರಿಯಾಗಿರುವ ಈ ವ್ಯವಹಾರಕ್ಕೆ ಏನೇನೂ ಸಂಕೋಚ ಇರದೇ ಬೆಂಬಲ ನೀಡಿದರು..!
ಮತ್ತೊಬ್ಬ ತೀರ್ಥಹಳ್ಳಿಯ ಸಹಕಾರಿ ಇಷ್ಟು ದೊಡ್ಡ ದರ ನೀಡಿ ಮ್ಯಾಮ್ಕೋಸ್ ಭಾರಿ ಅಸ್ತಿ ಮಾಡಿರುವುದು ಹೆಮ್ಮೆಯ ವಿಚಾರ ಅವರಿಗೆ ಚಪ್ಪಾಳೆ ಮೂಲಕ ಅಭಿನಂದನೆ ಹೇಳಬೇಕು ಎಂದು ರೋಮಾಂಚನಗೊಂಡು ನುಡಿದು ಈ ಅವ್ಯವಹಾರದ ಆರೋಪಕ್ಕೆ ರಕ್ಷಣೆ ನೀಡುವ ಪ್ರಯತ್ನ ನಡೆಸಿದರು.
ಸಹಕಾರ ಭಾರತೀಯ ಷೇರುದಾರರು ಸಂಸ್ಥೆಯ ವ್ಯವಹಾರವನ್ನು ಕಟುವಾಗಿ ಟೀಕಿಸಿ ಅಕ್ರಮದ ಸರಮಾಲೆಯೇ ಸಂಸ್ಥೆಯಲ್ಲಿ ತುಂಬಿ ಹೋಗಿದೆ ಎಂಬ ಅಭಿಪ್ರಾಯವನ್ನು ಮುಂದಿಟ್ಟರು. ಗೋಣಿಚೀಲ ಖರೀದಿ, ಸಾಲ ವಿತರಣೆ, ಅಡಿಕೆ ಮಾರಾಟ ನಿಯಮ ಬದ್ಧವಾಗಿ ನಡೆಯುತ್ತಿಲ್ಲ ಎಂಬ ಆರೋಪಗಳನ್ನು ಹೊರಿಸಿದರು.
ಸಹಕಾರ ಭಾರತಿಯ ಮುಖಂಡ, ಮಾಜಿ ಮ್ಯಾಮ್ಕೋಸ್ ಸದಸ್ಯ, ಎಪಿಎಂಸಿ ಸದಸ್ಯ ಸದಾಕಾಲ ಕಠೋರ ನಿಲುವುಗಳಿಂದ ಮುಲಾಜಿಲ್ಲದೆ ವ್ಯವಸ್ಥೆಯನ್ನು ಪ್ರಶ್ನಿಸುವಂತಹ ಸಿ.ಬಿ.ಈಶ್ವರ್ ಮುಂದಿಟ್ಟ ಪ್ರಶ್ನೆಗಳು ವ್ಯವಸ್ಥೆಯ ಲೋಪವನ್ನು ಎತ್ತಿ ಹಿಡಿದವು. 2018 ರಲ್ಲಿ ಸಂಸ್ಥೆಯೂ ಕಳುಹಿಸಿದ ಅಡಿಕೆ ಚೀಲಗಳನ್ನು ತುಂಬಿಸಿದ ಲಾರಿ ನಾಪತ್ತೆಯಾಗಿದೆ. ಸುಮಾರು 4 ಕೋಟಿ ವೆಚ್ಚ ಇದರಿಂದ ನಷ್ಟವಾಗಿದೆ. ಪ್ರಸ್ತಕ್ತ ಸಾಲಿನಲ್ಲಿಯೂ ಒಂದು ಲಾರಿ ನಾಪತ್ತೆಯಾಗಿದೆ. ಕೋಟ್ಯಾಂತರ ರೂಪಾಯಿ ವೆಚ್ಚದ ಲಾರಿ ಮಾರಾಟಕ್ಕೆ ಕಳುಹಿಸಿ ಉತ್ತರದಾಯಿತ್ವ ಮರೆತರೆ ಹೇಗಾಗುತ್ತದೆ. ಸಂಸ್ಥೆಗೆ ಆದ ನಷ್ಟವನ್ನು ಹೇಗೆ ಭರಿಸಬೇಕು ಎಂಬ ಪ್ರಶ್ನೆ ಮಾಡುತ್ತಿದ್ದಂತೆ ನಾಪತ್ತೆಯಾದ ಲಾರಿ ಪತ್ತೆಯಾಗಿಲ್ಲ ಎಂಬ ಉತ್ತರವು ಸಿಕ್ಕಿರುವುದು ಷೇರುದಾರರ ಎದೆ ನಡುಗಿಸಿತು.
ಮ್ಯಾಮ್ಕೋಸ್ ಹಗರಣಗಳ ಭೂಮಿ ಖರೀದಿಸುವ ತಿಳುವಳಿಕೆ ಪತ್ರ, ಜಾಹೀರಾತು ನೀಡುವ ಮುನ್ನ ಸಹಕಾರ ಇಲಾಖೆಯ ಅನುಮತಿ ಪಡೆಯಬೇಕಿದೆ. ಯಾಕೆ ಅನುಮತಿ ಪಡೆಯಲಿಲ್ಲ. ಅನುಮತಿ ಇಲ್ಲದೆ ಜಮೀನು ಖರೀದಿ ಮಾಡಿದ್ದು ಸರ್ಕಾರ ಇದನ್ನು ಅಕ್ರಮ ಎಂದು ರೆಜೆಕ್ಟ್ ಮಾಡಿದರೆ ಆಡಳಿತ ಮಂಡಳಿ ಮಾಡಿರುವ ವ್ಯವಹಾರವನ್ನು ರದ್ದುಪಡಿಸುತ್ತದೆಯೇ. ಜಮೀನನ್ನು ಮೂಲ ವಾರಸುದಾರರಿಗೆ ಹಿಂದಿರುಗಿಸಿ ಹಣವನ್ನು ಸಂಸ್ಥೆಗೆ ಜಮೆ ಮಾಡಲು ತಯಾರಿದ್ದೀರ ಎಂದು ಸಹಕಾರಿ ಮುಖಂಡ ಕಡ್ತೂರು ದಿನೇಶ್ ಪ್ರಶ್ನಿಸಿದರು.
ಮ್ಯಾಮ್ ಕೋಸ್ ಆಡಳಿತ ಮಂಡಳಿ ಪ್ರಶ್ನೆ ಕೇಳುತ್ತಿದ್ದಂತೆ ಪೆಚ್ಚಾಗಿ ಉತ್ತರಿಸದೆ ಮೌನವಹಿಸಿತ್ತು. ಕೆಲವು ಪ್ರಶ್ನೆಗಳಿಗೆ ಉತ್ತರ ನೀಡುವ ಬದಲು ನಿರ್ದೇಶಕರು ಪರಸ್ಪರ ಒಬ್ಬರ ಮುಖ ಮತ್ತೊಬ್ಬರು ನೋಡಿಕೊಂಡರೇ ವಿನಃ ಉತ್ತರಿಸುವ ಗೋಜಿಗೆ ಹೋಗಲಿಲ್ಲ.