ಸೌಹಾರ್ದ ಕಾಯ್ದೆ ತಿದ್ದುಪಡಿ ಸಹಕಾರಿ ವ್ಯವಸ್ಥೆಗೆ ಮಾರಕ

ವರ್ತಕರ ಸೌಹರ್ದ ಸಹಕಾರಿ ನಿರೀಕ್ಷೆಗೂ ಮೀರಿದ ಪ್ರಗತಿ ಸಾಧಿಸಿದೆ
ಹಿರಿಯ ನಾಗರೀಕರು-ನಿವೃತ್ತ ಸೈನಿಕರಿಗೆ ಕಡಿಮೆ ಬಡ್ಡಿಯಲ್ಲಿ ಬಂಗಾರದ ಸಾಲ
ಸೃಜನಾತ್ಮಕ ಪ್ರಶ್ನೆಗಳೊಂದಿಗೆ ಗಮನ ಸೆಳೆದ ನಿಲೇಶ್‌ ಜವಳಿ

ಠೇವಣಿಗೆ ಸಂಬಂಧಿಸಿದಂತೆ ಸೌಹಾರ್ದ ಕಾಯ್ದೆ ತಿದ್ದುಪಡಿ ಆಗುತ್ತದೆ ಎಂದು ಹೇಳಲಾಗುತ್ತಿದೆ. ಇದು ಸಹಕಾರಿ ವ್ಯವಸ್ಥೆ ಮೇಲೆ ಗಂಭೀರ ಪರಿಣಾಮ ಉಂಟು ಮಾಡಲಿದೆ. ಸೌಹಾರ್ದ ಸಹಕಾರಿಗೆ ಕಾನೂನು ಬದ್ಧವಾಗಿ ನೀಡಿರುವ ಆಯ್ಕೆಯ ಸ್ವಾತಂತ್ರ ಇಲ್ಲವಾಗುತ್ತದೆ. ಠೇವಣಿಯನ್ನು ಸರ್ಕಾರ ಸೂಚಿಸಿದ ಬ್ಯಾಂಕುಗಳಲ್ಲಿ ಇಡಬೇಕೆಂಬ ನಿಯಮ ಜಾರಿಗೊಳ್ಳುವ ಆತಂಕ ಎದುರಾಗಿದೆ ಶನಿವಾರ ತೀರ್ಥಹಳ್ಳಿಯ ವಿದ್ಯಾಧಿರಾಜ ಸಭಾ ಭವನದಲ್ಲಿ ನಡೆದ ಸರ್ವ ಸದಸ್ಯರ ಸಭೆಯಲ್ಲಿ ತಾಲ್ಲೂಕು ವರ್ತಕರ ಸೌಹಾರ್ದ ಸಹಕಾರಿ ಸಂಘದ ಅಧ್ಯಕ್ಷ ಡಾನ್‌ ರಾಮಣ್ಣ ಹೇಳಿದರು.

ಹಾಲಿ ಬಡ್ಡಿದರಕ್ಕಿಂತಲೂ ಕಡಿಮೆ ಬಡ್ಡಿದರ ಗ್ರಾಹಕರಿಗೆ ನೀಡಬೇಕಾದ ಅನಿವಾರ್ಯ ನಿರ್ಮಾಣವಾಗುತ್ತದೆ. ಸಹಕಾರಿ ವ್ಯವಸ್ಥೆಯ ಲಾಭ ತಲುಪದೆ ಕಡಿಮೆ ಬಡ್ಡಿದರದಲ್ಲಿ ಸಾಲ ವಿತರಿಸಲು ಕಷ್ಟವಾಗುತ್ತದೆ. ತೀರ್ಥಹಳ್ಳಿಯಲ್ಲಿ ಸಹಕಾರಿ ಸಂಸ್ಥೆಗಳ ನಡುವೆ ತೀವ್ರ ಸ್ಪರ್ಧೆ ಇದೆ. ಹಾಗಿದ್ದಾಗಲೂ ವರ್ತಕರ ಸೌಹಾರ್ದ ಸಹಕಾರಿ ನಿರೀಕ್ಷೆಗೂ ಮೀರಿದ ಪ್ರಗತಿ ಸಾಧಿಸಿದೆ. ಸ್ವಂತ ನಿವೇಶವನ್ನು ಹೊಂದಲಾಗಿದ್ದು ಮುಂದಿನ ದಿನಗಳಲ್ಲಿ ಕಟ್ಟಡ ನಿರ್ಮಾಣ ಮಾಡಲಾಗುತ್ತದೆ. ಹಿರಿಯ ನಾಗರೀಕರು ಮತ್ತು ಸೈನಿಕರಿಗೆ ಕಡಿಮೆ ಬಡ್ಡಿದರದಲ್ಲಿ ಬಂಗಾರ ಅಡಮಾನ ನೀಡಲಾಗುತ್ತಿದೆ. ಮುಂದಿನ ದಿನಗಳಲ್ಲಿ ರೈತರಿಗೆ ಜಮೀನು ಅಡಮಾನ ಸಾಲ ನೀಡುವ ಕುರಿತು ಚರ್ಚೆ ನಡೆಸಲಾಗುತ್ತಿದೆ ಎಂದರು.

ಪ್ರಶ್ನೋತ್ತರ ವೇಳೆಯಲ್ಲಿ ಕಲಾವಿದ ನಿಲೇಶ್‌ ಜವಳಿ ಸೃಜನಾತ್ಮಕ ಪ್ರಶ್ನೆಗಳೊಂದಿಗೆ ಗಮನ ಸೆಳೆದರು. ವರ್ತಕರ ಸೌಹಾರ್ದ ಸಂಘದಲ್ಲಿ ಬೇರೆ ಸಂಘಗಳಿಗಿಂತಲೂ ಹೆಚ್ಚಿನ ಪರಿಶ್ರಮವನ್ನು ಸಿಬ್ಬಂದಿ ವಿನಿಯೋಗಿಸುತ್ತಿದ್ದಾರೆ. ಹಾಗಾಗಿ ಲಾಭಾಂಶವನ್ನು ಕಡಿಮೆ ಘೋಷಣೆ ಮಾಡಿ ಅದರಲ್ಲಿ ಉಳಿದ ಹಣದಲ್ಲಿ ಸಿಬ್ಬಂದಿಯ ವೇತನವನ್ನು ಏರಿಸಬೇಕೆಂಬ ಸಲಹೆ ಸಭೆಯ ಗಮನ ಸೆಳೆಯಿತು. ಇದಕ್ಕೆ ಉತ್ತರಿಸಿದ ಅಧ್ಯಕ್ಷ ರಾಮಣ್ಣ ಸಿಬ್ಬಂದಿಗೆ ನಿಯಮಿತವಾಗಿ ಬೋನಸ್‌ ನೀಡಲಾಗುತ್ತಿದೆ ಎಂದರು.

ನಿರ್ದೇಶಕರಾದ ರಾಘವೇಂದ್ರ ಮಲ್ಯ, ಯುವರಾಜ್‌, ಬಳಗಟ್ಟೆ ಗಿರೀಶ್‌, ಕೋಣಂದೂರು ಅಶೋಕ್‌, ಸೊಪ್ಪುಗುಡ್ಡೆ ರಾಘವೇಂದ್ರ, ಮಹಮ್ಮದ್‌ ಶಫಿ, ಚೈತನ್ಯ ಜವಳಿ, ನಾಗರಾಜ್‌, ಸಹನಾ ಭಟ್‌, ಸಿಇಓ ರೂಪಾರಾವ್‌ ಮತ್ತಿತರಿದ್ದರು.